Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 198 Hüküm no: 169 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Osman’ın mehir ve nafaka bedeli olarak boşandığı kocası Mehmed Emin b. Yusuf’da olan alacak davasında sulh olduğu Ma‘rûz İstanbul’da Yazıcı mahallesi sâkinelerinden zâtı es-Seyyid Ali b. Mustafa ve es-Seyyid Mustafa b. es-Seyyid Hasan ta‘rîfleriyle mu‘arrefe olan Âişe Hatun bt. Osman meclis-i şer‘-i enverde zevc-i sâbıkı Mehmed Emin b. Yusuf muvâcehesinde mezbûre Âişe’nin ceddesi Emetullah bt. Abdullah nâm hatun dahi hâzıra olduğu hâlde mezbûr Mehmed Emin ile zevc-i dâhilim iken mukaddemâ zimmetinde mütekarrer olan mehr-i müeccel-i ma‘lûm ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere muhâla‘a olup ancak işbu yedimdeki müfredât defteri mantûkunca kırk guruş kıymetli mehr-i mu‘accelim olan emti‘am yed ve zimmetinde kalmağla hâlâ mehr-i mu‘accel-i mezkûrumu taleb ve da‘vâ eylediğimde ol dahi cevâbında hîn-i muhâla‘amızda hukūk-ı zevciyete müte‘allika âmme-i da‘vâdan zimmetimi ibrâ etmişidin deyü def‘ edip ol vechile beynimizde ba‘de vukū‘ı’l-münâza‘ât bâ-vesâtet-i muslihîn da‘vâ-yı mezkûremden mezbûr Mehmed Emin ile on beş guruş bedel-i makbûza sulh olup ben târih-i i‘lâma gelince hukūk-ı zevciyet ve sâire ve ceddem mezkûre Emetullah Hatun kezâlik târih-i mezkûra gelince âmme-i ahz u i‘tâya müte‘allika âmme-i de‘âvî ve mutâlebât ve kâffe-i eymân ve muhâsamâtdan zevc-i sâbıkım mezbûr Mehmed Emin’in zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimizde ol dahi ibrâ-i mezkûru kabûl eyledi deyü olan ikrârını mezbûr Mehmed Emin ve hâzıra-i mezbûre Emetullah hatunlardan herbirinin tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 28 Cumâdelûlâ sene 1162