Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 199 Hüküm no: 170 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hezargrad’ın Baniska-i Bâlâ köyü ve gayriden tımara mutasarrıf olan Mehmed Ağa b. Mustafa’nın tımarının mültezimi Hasan Çavuş’u azlederek Eskicumalı Mehmed’e iltizama verdiği Ma‘rûz Derûn-ı arzuhâlde mezkûr Hezargrad kazâsına tâbi‘ Baniska-i Bâlâ nâm karye ve gayriden bin yedi yüz yirmi akçe tımara mutasarrıf yine arzuhâlde mezkûr Mehmed Ağa b. Mustafa meclis-i şer‘-i enverde Eskicumalı sahib-i arzuhâl diğer Mehmed muvâcehesinde mârrü’z-zikr Hezargrad ahâlîsinden ve Dergâh-ı âlî yeniçeri çavuşlarından tımar-ı mezkûrun mukaddemâ mültezimi olan Hasan Çavuş Ağa dahi hazır olduğu hâlde bundan akdem tımar-ı mezkûrumun işbu bin yüz altmış iki senesine mahsûben Mart’ı ibtidâsından tamamına değin hâsıl olan mahsûlâtının zabtı yedine verilen temessüğüm mantûkunca mezbûr diğer Mehmed’e beş yüz elli guruş bedel-i iltizâm-ı makbûz mukābelesinde der-uhde ve iltizâm ol dahi ba‘de’l-kabûl mültezim-i evvel-i mezbûr Hasan Çavuş Ağa sene-i sâbıkı zabtından zarar da‘vâsı sadedinde olmağla mezbûr diğer Mehmed’i azl ve işbu sene-i mezkûre zabtını dahi yine mezbûr Hasan Çavuş Ağa’ya tevfîz ve ibkā etmişidim lâkin mezbûr Hasan Çavuş Ağa’nın tımar-ı mezkûr re‘âyâsına zulm ü te‘addîsi olduğunu Hezargrad kādısı efendi arz ve ahâlîsi mahzar etmekle hâlâ mezbûr Hasan Çavuş Ağa’yı tımar-ı mezkûr zabtından azl edip mârrü’z-zikr Eskicumalı mezbûr diğer Mehmed’e bâlâda mezkûr bedel mukābelesinde der-uhde ve iltizâm eylediğimde ol dahi kabûl eyledi deyü olan ikrârını mezbûr diğer Mehmed ile hâzır-ı merkūm Hasan Çavuş Ağa’dan herbirinin tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 27 Ca sene 1162