Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 203 Hüküm no: 178 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazasker ve Ser-etibbâ-yı padişahî Ömer Efendi’nin kızı Emetullah Hanım’ın, Koğacı Dede mahallesindeki fırınını Biyo v. Karaca ile Gorca v. Dani’ye kiraya verdiği Sultanselim’de ekmekçi dükkânı îcârı Ma‘rûz Mahmiye-i İstanbul’da Mollagürânî mahallesinde sâkine fahrü’l-muhadderât Emetullah Hanım bt. el-merhûmü’l-mebrûr Kazasker-i esbak ve Ser-etibbâ-yı şehriyârî-i esbak Ömer Efendi tarafından husûs-ı âti’z-zikre vekîlleri olduğu zât-ı mûmâ-ileyhâyı bi’t-ta‘rîfi’ş-şer‘î ârifân Abdurrahim Efendi b. Ahmed Efendi ve Çukadâr Hasan Çelebi b. Abdullah şehâdetleriyle sâbit ve sübût-ı vekâleti ber-vech-i şer‘î mahkûmun-bih olan İshak Efendi b. Ahmed Efendi meclis-i şer‘-i enverde ekmekçi tâifesinden Biyo v. Karaca ve Gorca v. Dani zimmîler muvâcehelerinde ekmekçi esnâfından es-Seyyid el-Hâc Abdurrahman Çelebi b. es-Seyyid el-Hâc Kasım dahi hazır olduğu hâlde müvekkilem mûmâ-ileyhâ hazretlerinin mahmiye-i mezbûrede Sultan Selim Han Câmi‘-i şerîfi civârında Koğacı Dede mahallesinde vâki‘ ma‘lûmü’l-hudûd ve’l-müştemilât ekmekçi fırınını hâzır-ı mezbûr es-Seyyid el-Hâc Abdurrahman Çelebi’nin zikri âtî ücretin beher mâh edâsına bi’l-emr ve’l-kabûl kefâletiyle târih-i i‘lâmdan beher şehr bin akçe ücretle mesfûrân Biyo ve Gorca zimmîlere bi’l-vekâle îcâr ve teslîm eylediğimde onlar dahi ber-vech-i muharrer istîcâr ve tesellüm ve kabûl eylediler deyü olan <> vekîl-i mezbûrun bi’l-vekâle ikrârını hâzır-ı mezbûr es-Seyyid el-Hâc Abdurrahman Çelebi ile mesfûrân Biyo ve Gorca zimmîlerden herbirinin tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 27 Ca sene 1162