Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 203 Hüküm no: 179 Orijinal metin no: [25a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Develi kasabasından Fazlı b. Mustafa’nın, hanımı olup Hasan b. Süleyman’la nikahlanan Ayşe bt. Hacı Ali’nin kendisine teslim edilmesi talebinin reddedildiği Ma‘rûz Anadolu’da Develi kasabası ahâlîsinden İstanbul’da Kurşunlu Han’da mütemekkin sahib-i arzuhâl Fazlı b. Mustafa meclis-i şer‘-i hatîrde kasaba-i mezbûre ahâlîsinden derûn-ı arzuhâlde mezkûrü’l-ism es-Seyyid Hasan b. Süleyman mahzarında hâlâ kasaba-i mezbûrda sâkine Âişe bt. Hacı Ali nâm hatun târih-i i‘lâmdan dokuz sene mukaddem on bin akçe mehr-i müeccel tesmiyesiyle huzûr-ı Müslimînde nefsini bana tezvîc ben dahi ber-vech-i muharrer tezevvüc ve kabûl eylediğimden sonra mezbûre Âişe benim taht-ı nikâhımda iken on beş gün mürûrunda yine nefsini işbu merkūm es-Seyyid Hasan Çelebi’ye tezvîc etmekle beynleri tefrîk ve zevce-i mezkûremi bana teslîme tenbîh olunmasını taleb ederim deyü olan nikâh da‘vâsı zevc-i sânî-i dahl-i mezbûr Seyyid Hasan huzûrunda mezbûre Âişe’den olmak iktizâ etmekle müdde‘î-i mezbûrun takrîr-i meşrûhu üzere eylediği nikâh da‘vâsı sahîha olmamağın mezbûr Seyyid Hasan’a şer‘an suâl dahi teveccüh etmeyip müdde‘î-i mezbûr Fazlı bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî-gurreti min-Cumâdelâhire sene 1162