Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 204 Hüküm no: 181 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Ali ve Osman Beşe b. Ahmed’in, Zafiri v. Simyon’un dükkânının firar eden kiracısında olan alacaklarını ödemesi için Zafiri’ye açtıkları davanın reddedildiği Ma‘rûz Derûn-ı arzuhâlde kayıkhâne sâkinlerinden Ahmed Beşe b. Ali ve Osman Beşe b. Ahmed meclis-i şer‘-i enverde sahib-i arzuhâl Zafiri v. Simyon zimmî muvâcehesinde merkūm Zafiri zimmînin zikrolunan kayıkhâne hizâsında vâki‘ ma‘lûmü’l-hudûd çörekçi ve hoşâbcı dükkânında müste’ciri iken firâr edip hâlâ mekânı ma‘lûm olmayan zimmînin nefsine kefîldir deyü zimmî-i merkūmdan cihet-i karzdan mezbûr Ahmed Beşe matlûbu olan otuz iki guruş ve mezkûr Osman Beşe dahi matlûbu olan yetmiş guruş haklarını takrîr-i meşrûhları üzere dükkân sahibi merkūm Zafiri zimmîden talebleri sahîh olmamağın hasımları merkūm Zafiri zimmîye şer‘an suâl dahi teveccüh etmeyip müdde‘iyân-ı mesfûrân bî-vech-i şer‘î mu‘ârazadan men‘ olunduğu Bâb’dan huzûr-ı âlîlerine i‘lâm olundu. Fî 2 C sene 1162