Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 205 Hüküm no: 182 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hasan’ın boşandığı kocası Kadı Mustafa Efendi’de eşya bedelinden olan alacağının taksitle ödenmesini kabul ettiği Ma‘rûz İstanbul’da Debbağzâde el-Hâc Hasan mahallesinde sâkine ve zâtı ta‘rîf-i şer‘î ile mu‘arrefe olan Hadîce bt. Hasan nâm hatun meclis-i şer‘-i hatîrde zevc-i sâbıkı kuzâtdan Mustafa Efendi mahzarında mezbûr Mustafa Efendi ile zevciyet beynimizde kāime iken eşyâ-yı memlûkemden on miskāl bir çift altın bilezik ve bir telli hatâyî kavuşdurma ve bir kebîr sinimi bi-gayr-ı hakkın elli beş buçuk guruşa âhara bey‘ ve semen-i mezkûru kendi mesârifine sarfla istihlâk etmekle meblağ-ı mezkûr elli beş buçuk guruşu mezbûr Mustafa Efendi’den taleb ederim deyü ba‘de’d-da‘vâ ve’l-ikrâr lâkin meblağ-ı mezkûru hâlen ve def‘aten bana edâya iktidârı olmamağla târih-i i‘lâmdan bir sene tamamına değin mezbûr Mustafa Efendi’yi tecîl eylediğimde ol dahi meblağ-ı mezkûru târih-i merkūm tamamında bana edâya ta‘ahhüd eyledi deyü olan ikrârını ba‘de’t-tasdîk huzûr-ı âlîlerine i‘lâm olundu. Fî 2 Cumâdelâhire sene 1162