Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 207 Hüküm no: 186 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolulu Molla Ahmed b. Mehmed’i bıçakladığı kesinleşen Molla Abdurrahman’ın cezasının Molla Ahmed’in iyileşmesinden sonra verileceği Ma‘rûz İstanbul’da Ebulfeth Sultan Mehmed Han Câmi‘-i şerîfi civârında Akdeniz tarafındaki Çiftebaşı Medresesi sâkinlerinden Bolevî Molla Ahmed b. Mehmed’in vekîl-i müsecceli Memiş Beşe b. Mustafa meclis-i şer‘-i enverde Mumcu Mehmed Beşe mübâşeretiyle ihzâr-ı şer‘ olunan Molla Abdurrahman b. Ahmed muvâcehesinde işbu mezbûr Molla Abdurrahman refîkleri gāibân ani’l-meclis Hasan ve diğer Hasan nâm kimesneler ile târih-i i‘lâmdan altı gün mukaddem ba‘de salâti’l-mağrib câmi‘-i mezkûr içinde Karadeniz tarafındaki direk dibinde müvekkilim mezbûr Molla Ahmed’i amden bi-gayr-ı hakkın bıçak ile işbu mezbûr Molla Abdurrahman sol boş böğründen bir yerinden darb ve cerh edip ve mezbûr Hasan dahi sağ boş böğründen bir yerinden darb ve cerh edip ve merkūm diğer Hasan uyruğundan darb ve cerh edip müvekkilim mezbûru sahib-i firâş eylediler bi’l-vekâle mûceb-i şer‘îsini taleb ederim deyü ba‘de’d-da‘vâ ve’l-inkâr vekîl-i müdde‘î-i mezbûr Memiş Beşe bi’l-vekâle müdde‘âlarından mezbûr Molla Abdurrahman’ın müvekkili mezbûru sol boş böğründen darb ve cerhini ahrâr-ı ricâl-i Müslimînden lede’t-tezkiye adâletleri zâhir olan Molla Osman b. Süleyman ve Molla İbrahim b. Murad nâm kimesneler şehâdetleriyle mezbûr Molla Abdurrahman muvâcehesinde ba‘de’l-isbât ve’l-kabûl mûceb-i şer‘îsiyle hükm cerh-i mezkûrun ber’ine tevkīf olunmak iktizâ eylediği Mahkeme-i Bâb’dan huzûr-ı âlîlerine i‘lâm olundu. Fî 4 min-Cumâdelâhire sene 1162