Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 206 Hüküm no: 185 Orijinal metin no: [25b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Agop’un yanında çalıştığı Uncu Mıgırdıç v. Manol’da kalan alacağının ödenmesi Ma‘rûz Uncu tâifesinden sahib-i arzuhâl Mıgırdıç v. Manol meclis-i şer‘-i enverde tâife-i mezkûrdan olup derûn-ı arzuhâlde mezkûrü’l-ism Serkiz v. Agop zimmî muvâcehesinde mukaddemâ merkūm Serkiz zimmînin Sultanhamamı kurbünde vâki‘ un değirmeninde unculuk hizmetinde yevmî on iki para ücret kavliyle dokuz ay hizmet edip müddet-i mezkûrede olan hizmetimin üç aylık ücretimi bana edâ bâkī altı aylık elli dört guruş ücret-i hakkım zimmetinde kalmağla taleb ederim deyü ba‘de’d-da‘vâ ve’s-suâl merkūm Serkiz zimmî cevâbında müdde‘î-i mesfûr ancak ücretini ahz eylediği üç ay hizmetini ikrâr ziyâde hizmetini inkâr etmeğin müdde‘î-i mesfûr müdde‘âsını ahrâr-ı ricâl-i ehl-i zimmetden ve uncu tâifesinden lede’t-tezkiye şehâdetleriyle makbûle olan Avanis v. Pandar ve Kirvork v. Norsis ve Kirkor v. Mardonos ve Abraham v. Ferhad nâm zimmîler şehâdetleriyle merkūm Serkiz muvâcehesinde vech-i şer‘î üzere ba‘de’l-isbât ve’l-kabûl mûcebiyle hükmolunup meblağ-ı mezkûr elli dört guruş ücret-i bakıyeyi müdde‘î-i mesfûr Mıgırdıç zimmîye tamamen edâ ve teslîm ile merkūm Serkiz zimmîye tenbîh olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 5 min-Cumâdelâhire sene 1162