Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 208 Hüküm no: 188 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Halife b. Ali’nin, tasarrufundaki vakıf evin arsasını komşusu Hatice Hatun’a sattığı ve binanın kıymeti hesaplandıktan sonra bedelini de Hatice Hatun’dan almak üzere anlaştıkları Keşif bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyâna savb-ı şer‘den bi’l-iltimâs ta‘yîn olunan keşif nâibimiz Ruhi Mustafa Efendi dâ‘îleri mi‘mârân-ı hâssadan es-Seyyid İsmail ve Ali halîfeler ile derûnda mezkûr mahâll-i nizâ‘a varıp cerîdede mastûrü’l-esâmî Müslimîn huzûrunda akd eylediği meclis-i şer‘de sahibe-i arzuhâl Hâcce Hadîce Hatun’un hasmı ve hem-civârı Mehmed Halîfe b. Ali ile hâlâ tasarrufunda ve münâza‘un-fîh olan vakıf menzile havâle ve irtifâ‘-ı binâ nizâ‘ı mütemâdî olmağın tavassut-ı muslihîn ile mezbûr Mehmed Halîfe bi’l-icâreteyn taht-ı tasarrufunda olan arsa-i menzil-i merkūmu iki yüz kırk üç guruş bedel-i makbûza mezbûre Hâcce Hadîce Hatun’a zâtı ba‘de’t-ta‘rîfi’ş-şer‘î meclis-i ma‘kūd-ı mezkûrda hüsn-i rızâ ve izn-i mütevellî ile ferâğ ve kasr-ı yed ol dahi ber-minvâl-i muharrer tefevvüz ve kabûl eylediğinden sonra menzil-i mezkûrun mevcûd olan taş duvar ve sâir ebniyesinin kereste ve mismâr ve yevmiye-i amele ve gayri masrûfu mi‘mârân-ı mezbûrân ve mu‘temedân-ı bennâ ma‘rifetleriyle ile hesâb olunup ne mikdâr[a] bâliğ <> olursa bi’t-tamam kendiye edâ etmek üzere beynleri ıslâh ve irzâ‘ olunduğu mevlânâ-yı mûmâ-ileyh inhâsıyla huzûr-ı âlîlerine i‘lâm olundu. Fî-gurreti C sene 1162