Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 208 Hüküm no: 189 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Beşe b. Osman ile büyük validesi Hâce Hatice Hatun’un inşasına başladıkları evlerinin komşularının binalarına zarar vermeyecek şekilde yapmaları Keşf-i havâle bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyâna savb-ı şer‘-i enverden bi’l-iltimâs ta‘yîn olunan keşif nâibimiz Ruhi Mustafa Efendi dâ‘îleri mi‘mârân-ı hâssı el-Hâc Mustafa ve Abdullah halîfeler ile mahâll-i nizâ‘a varıp cerîdede mastûrü’l-esâmî Müslimîn huzûrunda akd eylediği meclis-i şer‘de sahib-i arzuhâl Yahya Beşe b. Osman ile şerîke ve büyük vâlidesi Hâcce Hadîce Hatun’un vekîl-i müsecceli İbrahim Efendi b. Mehmed câr-ı mülâsıkları Yakub Ağa ve Müezzin İbrahim Halîfe ve Cerrâh Halil ve Lütfullah Çelebi ve Tüfekçi Mustafa ve Kadri Beşe’den sâkin oldukları menzillerinin pencereleri işbu hâneye ve binâsına mübâşeret olunan menzilimiz harîmine nâzıra olmağla havâle zararı olduğunu iddi‘â etmeğin gıbbe’s-suâl mezbûrûn cevâblarında herbiri hakīkat-i hâl minvâl-i muharrer üzere idiğini i‘tirâf edip lâkin kendi menzillerinin ebniyesi kadîme ve mezbûrânın münâza‘un-fîh olan menzil binâları hâdis olmağın zarar-ı fâhişine binâen havâle kat‘ı ile lâzımdır deyü def‘le mukābelelerini mi‘mârân-ı mezbûrân ba‘de’n-nazar tasdîk etmeğin mûcebiyle mezbûrâna menzil-i mezbûr hitâm-ı binâsında pencerelerinin gerek mezbûrûn ve gerek âharın makarr-ı nisvân olan mahallerine nezâret-i mahzûru münâsib olan havâle kat‘ı ile def‘ olunmak için mübâşirîne tenbîh eylediği mevlânâ-yı mûmâ-ileyh inhâsıyla huzûr-ı âlîlerine i‘lâm olundu. Fî 2 min-Cumâdelâhire sene 1162