Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 213 Hüküm no: 196 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Osman’ın, saatini alan Mehmed Beşe b. Osman’a açtığı davada sulh olup sulh bedelini de taksitler halinde tahsil edeceği Ma‘rûz Mumcu İsmail Beşe mübâşeretiyle Bâb Mahkemesi’ne ihzâr olunan el-Hâc Hüseyin’in hasmı Mehmed Beşe b. Osman meclis-i şer‘de mezbûr el-Hâc Hüseyin muvâcehesinde târih-i i‘lâmdan altı ay mukaddem gemi refîkı iken sefîne içinde yatağım üzerinde olan kırk guruş kıymetli bir pendül sâ‘atimi bi-gayr-ı hakkın ahz etmişidi hâlâ taleb ederim deyü tesâddî eylediği da‘vâsından bâ-vesâtet-i muslihîn an-inkâr yirmi iki guruş üzerine sulh olup mâ‘adâsına müte‘allika da‘vâdan mezbûr el-Hâc Hüseyin’in zimmetini ibrâ ve bedel-i sulh olan meblağ-ı mezkûr yirmi iki guruşu dahi hâlen ve def‘aten edâya iktidârı olmayıp tecîl ve taksîte tâlib olduğunda ol dahi beher şehr kendiye beşer guruş verip târih-i i‘lâmdan dört ay on iki gün tamamına değin tecîl ve taksît eylediğimde mezbûr el-Hâc Hüseyin dahi kabûl ve ber-vech-i muharrer müddet-i mezbûre tamamına değin bedel-i sulh-ı mezkûru tamamen edâya ta‘ahhüd eylediği huzûr-ı âlîlerine i‘lâm olundu. Fî 8 C sene 1162