Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 213 Hüküm no: 197 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hür olduğunu ispat eden Şehriban’ın azat olmak için Hacı Ebubekir b. Hüseyin’e verdiği altınlarının kendisine iade edilmesi Ma‘rûz Derûn-ı arzuhâlde mezkûre Hanım nâm-ı evvel Şehriban bi’t-terâzî Mahkeme-i Bâb’da meclis-i şer‘-i enverde esirci tâifesinden sahib-i arzuhâl el-Hâc Ebûbekir b. Hüseyin muvâcehesinde ben diyâr-ı Acem’de medîne-i Tebriz’de Deveci mahallesi ahâlîsinden hürrü’l-asl Müslim-i sünnî olan Mehmed Kulu nâm kimesnenin firâş-ı sahîhinden hâsıla ve hürretü’l-asl Müslime-i sünniye olan zevce-i menkûhası Fâtıma nâm hatundan mütevellide hürretü’l-asl Müslime-i sünniye iken bi-takdîrillâhi te‘âlâ bi-gayr-ı hakkın istirkāk olunup işbu mezbûr Hacı Ebûbekir’in yedine geldiğimde mezbûr el-Hâc Ebûbekir târih-i i‘lâmdan on sekiz ay mukaddem bana kırk sekiz zer-i mahbûb getir seni âzad edeyim demekle ben dahi merhamet sahibesi hatunlardan kırk sekiz zer-i mahbûb İstikrâz ve ahz edip meblağ-ı mezkûr kırk sekiz zer-i mahbûbu ki yüz otuz iki guruş bahâm olmak üzere işbu mezbûr el-Hâc Ebûbekir’e def‘ ve teslîm eylediğimde ol dahi meblağ-ı mezkûru yedimden ahz u kabz edip yine beni âzad etmeyip Abdülgani nâm esirciye semen-i ma‘lûma ba‘de’l-bey‘ ve’t-teslîm ol dahi Kökcü İbrahim nâm kimesneye semen-i ma‘lûma ba‘de’l-bey‘ ve’l-kabz ben müşteri-i sânî-i mezkûrun yedinde iken bâlâda mezkûr olduğu üzere müşteri-i sânî-i mezkûr Kökcü İbrahim muvâcehesinde hürretü’l-asl Müslime-i sünniye olduğumu yedimdeki i‘lâm-ı şer‘î mantûkunca zikrolunan Deveciler mahallesi ahâlîsinden Mehmed b. Ali ve Hüseyin b. el-Hâc İsmail şehâdetleriyle ba‘de’l-isbât ve’l-kabûl mûcebiyle ba‘de’l-hükm benim hürriyet-i asliyetim zâhir olmağla mezbûr el-Hâc Ebûbekir’in bâlâda mezkûr olduğu üzere [27b] bi-gayr-ı hakkın benim yedimden aldığı kırk sekiz zer-i mahbûbu taleb ederim deyü ba‘de’d-da‘vâ ve’s-suâl mezbûr el-Hâc Ebûbekir cevâbında fi’l-vâki‘ mukaddemâ müdde‘iye-i mezbûreye câriye-i memlûkesi olmak üzere vaz‘-ı yed ve ber-vech-i muharrer Abdülgani’ye bey‘ini ve müdde‘iye-i mezbûrenin müşteri-i sânî-i mezkûr Kökcü İbrahim yedinde ve muvâcehesinde hürriyet-i asliyeti sâbit olduğunu ikrâr lâkin müdde‘iye-i mezbûreden zikrolunan altınları ahzını inkâr etmeğin müdde‘iye-i mezbûre müdde‘âsını ahrâr-ı ricâl-i Müslimînden lede’t-tezkiye adâletleri zâhir olan medîne-i Hazret-i Ebî Eyyûb-i Ensârî’de hazret-i müşârün-ileyh türbe-i şerîfesi civârında sâkin İbrahim Çelebi b. Davud ve mahmiye-i mezbûrede Baklalı mahallesinde sâkin mahalle-i mezbûre müezzini Molla Osman b. Ahmed nâm kimesneler şehâdetleriyle mezbûr el-Hâc Ebûbekir muvâcehesinde vech-i şer‘î üzere ba‘de’l-isbât ve’l-kabûl mûcebiyle hükmolunup meblağ-ı mezkûr kırk sekiz zer-i mahbûbu müdde‘iye-i mezbûre Şehriban Hatun’a edâ ve teslîm ile mezbûr el-Hâc Ebûbekir’e tenbîh olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 8 min-Cumâdelâhire sene 1162