Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 222 Hüküm no: 211 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Petro tarafından katledilen Domle bt. Kostanti’nin varislerinin diyet bedelini sulh yoluyla Petro’nun babasından alıp zimmet ibrası yaptıklarından Petro’nun hapisten bırakılması Diyetden ibrâ Ma‘rûz Derûn-ı arzuhâlde ve hâmişindeki derkenârlarda mezkûre olan katîle Domle zimmiye bt. Kostantin v. Ayvaz’ın hasran vâriseleri anası Susana bt. Gülistan ve li-ebeveyn kız karındaşı Zoli zimmiyeler ile katîle-i merkūmenin sadriye kızları olup hîn-i katl ve helâkinde sagīreler ve hâlen sin ve cüsselerinin bulûğlarına tahammüllü olup ve bulûğlarını dahi mu‘terifeler ve rüştleri dahi olduğu sâkineler oldukları Mirâhur mahallesi ahâlîsinden Müezzin es-Seyyid Hasan Çelebi b. Mustafa ve es-Seyyid Mehmed Çelebi b. Salih ve Attar el-Hâc Ali b. Hüseyin ve Molla Süleyman b. Mehmed nâm kimesneler ile Manav Angeli v. Panayot ve Taşçı Todori v. Tomin ve Abacı Belço v. Üstoyan zimmîlerin ihbârlarıyla zâhir olan Belorya ve Zafire zimmiye-i şâbbeler meclis-i şer‘-i enverde mûrisleri ve anaları katîle-i mesfûrenin kātili olup merkūmetân Belorya ve Zafire’nin babaları olan sahib-i arzuhâl Petro zimmînin babası ve tarafından vekîl-i şer‘îsi Foti zimmî muvâcehesinde mukaddemâ ve târih-i i‘lâm senesi Cumâdelûlâ’sı selhinde vekîl-i merkūm Foti zimmî ile mûriseleri katîle-i mesfûrenin beş bin dirhem-i fıdda diyet-i mahkûmun-bihâsından rızâ ve ihtiyârlarıyla yetmiş guruş bedel-i makbûza sulh olup mâ‘adâsına müte‘allika âmme-i da‘vâdan mahbûs-ı mesfûr Petro zimmînin zimmetini ibrâ ve ıskāt eylediklerini vârisât-ı mezkûrâtdan herbiri bi-tav‘ihâ ikrâr ve i‘tirâf edip ve hâlâ ibrâ ve ıskātları üzere sâbiteler dahi olmağla hasbe’ş-şer‘i’l-enver zimmî-i mahbûs-ı merkūm Petro’yu habsden ıtlâkı iktizâ eylediği Mahkeme-i Bâb’dan huzûr-ı âlîlerine i‘lâm olundu. Fî 13 min-Cumâdelâhire sene 1162