Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 223 Hüküm no: 213 Orijinal metin no: [29a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedi Abdullah’ın, kira bedelinden kalan alacağının ödenmesi talebiyle Hekim Dimitri’ye açtığı davada Dimitri’nin sulh yoluyla ödediğini ispat ettiğinden davanın reddedildiği Ma‘rûz Sahib-i arzuhâl Abdullah nâm mühtedî meclis-i şer‘-i enverde derûn-ı arzuhâlde mastûrü’l-ism Hekîm Dimitri nâm zimmî muvâcehesinde mesfûr Dimitri târih-i i‘lâmdan beş sene mukaddem Bükreş kasabasında vâki‘ menzilimde beher şehr beşer guruş ücret kavliyle bir buçuk sene sâkin olmağla müddet-i mezkûrede müctemi‘ olan doksan guruş hakkımdan ancak üç buçuk guruşunu yedinden ba‘de’l-kabz seksen altı buçuk guruş hakkım zimmetinde bâkī kalmağla taleb ederim deyü da‘vâ eyledikde ol dahi cevâbında meblağ-ı mezkûru bundan akdem benden taleb ve da‘vâ sadedinde olduğunda tavassut-ı muslihîn ile an-inkâr üç buçuk guruş bedel-i makbûza sulh olup mâ‘adâsına müte‘allika âmme-i da‘vâdan benim zimmetimi ibrâ ve ıskāt etmişidi deyü takrîr-i meşrûhu üzere hâlâ şer‘iyâtî el-Hâc Abdullah Efendi hâtemi ile mahtûm bir kıt‘a i‘lâm-ı şer‘î ibrâzıyla ba‘de’d-def‘ ve’l-ikrâr mûcebince müdde‘î-i mezbûr mühtedî Abdullah bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 14 C sene 1162