Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 224 Hüküm no: 214 Orijinal metin no: [29a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın, kendisini dövüp hapsettiği iddiasıyla Kara Osman Çavuş’a açtığı davada haksız bulunarak davanın reddedildiği Ma‘rûz İstanbul’da Kemânkeş Kara Mustafa Paşa mahallesinde sâkine ve zâtı Mustafa b. Osman ve Ahmed Beşe b. İbrahim ta‘rîfleriyle mu‘arrefe olan Fâtıma bt. Abdullah nâm hatun meclis-i şer‘de Mehter Ahmed kulları mübâşeretiyle ihzâr-ı şer‘ olunan kayını hâlâ zevci Halil Çavuş’un li-ebeveyn er karındaşı Kara Osman Çavuş muvâcehesinde târih-i i‘lâmdan bir ay mukaddem mezbûr Kara Osman Çavuş bi-gayr-ı hakkın beni darb ve sol kolumu mecrûh ve ayağıma bukağı urup habs etmekle mûceb-i şer‘îsini taleb ederim deyü da‘vâ ve mezbûr Kara Osman Çavuş dahi cevâbında müdde‘iye-i mezbûreyi darb ve habsini ikrâr ancak müdde‘iye-i mezbûrenin öteden beri ayda bir ve iki def‘a dimâğı muhtel ve cünûnu zuhûr eder olmağla yine târih-i mezbûrede dahi dimâğı muhtel ve cünûnu zuhûr edip mekşûfetü’l-avrat kapudan taşra hurûc etmekle zabt ve hıfzı’çün nazaran-lehâ darb ve habs etmişidim deyü ba‘de’d-def‘ ve’l-inkâr mezbûr Kara Osman Çavuş def‘-i mezkûrunu ahâlî-i mahalleden imâmı Süleyman Efendi b. Zeynelabidin ve es-Seyyid İbrahim b. Osman ve Mustafa b. Osman ve Ahmed Beşe b. İbrahim ve Osman Odabaşı Ağa b. İbrahim ve Ahmed Ağa b. Abdullah mezbûre Fâtıma muvâcehesinde herbiri alâ-tarîkı’ş-şehâde haber vermeğin mûcebiyle müdde‘iye-i mezbûre bî-vech mu‘ârazadan men‘ olunduğu Mahkeme-i Bâb’dan tescîl huzûr-ı âlîlerine i‘lâm olundu. Fî 13 min-Cumâdelâhire sene 1162