Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 237 Hüküm no: 236 Orijinal metin no: [31b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çukadar b. Mehmed’in, rehin kürkünü geri vermesi için Osman b. Ahmed’e açtığı davada kürkün kaybolduğu ve Osman’ın da tazminiyle yükümlü olmadığı Ma‘rûz Bâ‘is-i i‘lâm Süleyman Çukadâr b. Mehmed meclis-i şer‘de hasmı Osman b. Ahmed muvâcehesinde târih-i i‘lâmdan iki buçuk ay mukaddem mezbûr Osman’dan iktirâz ve ahz eylediğim yedi guruş mukābelesinde mezbûr Osman’a malımdan elli guruş kıymetli cevizî şâlîya kaplı bir sincab kürkümü rehin vaz‘ ve teslîm ol dahi yedimden ahz u kabz etmişidi hâlâ deyn-i mezkûrumu yedimden kabz ve rehn-i mezkûrumu fek ile bana teslîme tenbîh taleb ederim deyü ba‘de’d-da‘vâ ve’s-suâl mezbûr Osman [32a] cevâbında kazıyye minvâl-i muharrer üzere olduğunu ikrâr lâkin zikrolunan rehin benim sâkin olduğum Ördekkasab mahallesinde vâki‘ menzilimin mekân-ı muhrezimden bilâ-ta‘ad velâ-taksîr zâyi‘ olmağla deyn-i mezkûrum sâkıt ve ziyâde kıymeti dahi yedimde emânet olmağla zimmetim damânından berîdir deyü olan kavlinde yemîniyle tasdîk olunur olmağla mezbûr Osman’ın rehn-i mezkûrun hıfzında te‘addi ve taksîri olmadığına bi’t-taleb ba‘de’t-tahlîfi’ş-şer‘î mûcebiyle müdde‘î-i mezbûr Çukadâr Süleyman bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 28 min-Cumâdelâhire sene 1162