Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 237 Hüküm no: 235 Orijinal metin no: [31b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Osman’ın Ayşe Hatun bt. Abdullah’a kalan borcunu ödemesine yapılan tenbih Ma‘rûz İstanbul’da Mi‘mâr Sinan mahallesi sâkinelerinden olup zâtı li-ebeveyn er karındaşı Mehmed b. Abdullah ve es-Seyyid İbrahim Efendi b. es-Seyyid İbrahim ta‘rîfleriyle mu‘arrefe olan Âişe bt. Abdullah nâm hatun meclis-i şer‘-i enverde Muhzır es-Seyyid Ali mübâşeretiyle ihzâr-ı şer‘ olunan İbrahim Efendi b. Osman muvâcehesinde mezbûr İbrahim Efendi zimmetinde işbu yedime verdiği temessüğü mantûkunca cihet-i karzdan elli yedi guruş hakkım olmağla taleb ederim deyü mazmûnu takrîrine mutâbık bir kıt‘a temessük ibrâz ile ba‘de’d-da‘vâ ve’s-suâl mezbûr İbrahim Efendi cevâbında fi’l-vâki‘ müdde‘iye-i mezbûreye meblağ-ı mezkûr elli yedi guruş deyni olmak üzere temessük verdiğini ikrâr lâkin meblağ-ı mezkûrun on iki guruşu ribâdır deyü olan def‘ini beyâna kādir olamayıp lede’l-istihlâf ve’t-tahlîfi’ş-şer‘î alâ-mûceb-i ikrârihî meblağ-ı mezkûr elli yedi guruşu müdde‘iye-i mezbûre Âişe Hatun’a edâ ve teslîm ile mezbûr İbrahim Efendi’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 28 C sene 1162