Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 238 Hüküm no: 238 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogasıcı Seyyid Ömer b. Mustafa’nın alacak iddiasıyla Haçador v. Bağdasar’a açtığı davayı ispat edemediği Ma‘rûz Derûn-ı arzuhâlde mezkûr Bogāsıcı es-Seyyid Ömer b. Mustafa meclis-i şer‘de sahib-i arzuhâl Haçador v. Bağdasar zimmî muvâcehesinde merkūm Haçador zimmî zimmetinde mukaddemâ malımdan ve yedimden iştirâ ve kabz eylediği beş top karanfilli ve bir top Hamid kırmızısı ki cem‘an altı top bogası semeninden dokuz buçuk guruş hakkım olmağla taleb ederim deyü ba‘de’d-da‘vâ ve’l-inkâr müdde‘î-i mezbûr es-Seyyid Ömer müdde‘âsını beyân için ba‘de’l-istimhâl ve’l-imhâli’ş-şer‘î on altı gün mürûr edip müdde‘âsını beyâna kādir olamayıp istihlâfa dahi tâlib olmamağla müdde‘î-i mezbûr es-Seyyid Ömer bilâ-beyyine ve’l-istihlâf da‘vâ-yı mezkûresiyle merkūm Haçador zimmîye bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 29 C sene 1162