Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 239 Hüküm no: 239 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi, Yakub Çelebi ve Abdurrahman Çelebi kardeşler ile Şerban’ın Londi ve Kokmac zimmilere sattıkları kasap aletlerinin satışının iptal edilmesi taleplerinin reddedildiği Bâ-mühr-i hazret-i efendi Ma‘rûz es-Seyyid Mustafa Çelebi ve es-Seyyid Yakub Çelebi ve es-Seyyid Abdurrahman Çelebi ibnû Mehmed nâm kimesneler ve Şerban v. Mihal nâm zimmî Mumcu Mehmed Beşe mübâşeretiyle meclis-i şer‘a ihzâr ettirdikleri Londi v. Kondi nâm zimmî muvâcehesinde herbiri bizim üçümüzün Tophâne’de vâki‘ iki aded kasab dükkânında mevcûd gedik ta‘bîr olunur ale’l-iştirâki’s-seviy tasarrufumuzda olan âlât-ı ma‘lûmemizi ve mesfûr Şerban zimmî kezâlik Tophâne’de vâki‘ iki aded kasab dükkânında mevcûd tasarrufunda olan âlât-ı ma‘lûmeyi bin yüz altmış bir senesi Şa‘bân’ı gurresinden altmış dört senesi Receb-i şerîf’i gāyetine değin üç seneliğini işbu merkūm Londi zimmî ile gāib ani’l-beled Kokmac v. Kesfo nâm zimmîye bi-safkatin vâhidetin doksan bin akçe ber-vech-i peşîn yedlerinden makbûz-ı icâre ile îcâr ve teslîm edip onlar dahi ber-vech-i muharrer istîcâr ve kabz ve kabûl etmişler idi el-hâletü hâzihî biz üçümüz ve mesfûr Şerban fesh-i akd-i icâre murâd edip vakt-i îcârımızdan tamam bir sene mürûr etmekle makbûzumuzdan altmış bin akçeyi mersûm Londi’ye red ile zikrolunan dükkânlarda olan âlât-ı ma‘lûmemizi istirdâd ederiz deyü tesâddî eylediklerinde da‘vâlarında fesh-i akd-i icâreyi îcâb eder özr-i şer‘î beyân etmediklerinden mâ‘adâ mersûm Kokmac zimmî dahi gāib olup mevcûd olmamağla da‘vâ-yı meşrûhaları mesmû‘a olmamağın mezbûrûn es-Seyyid Mustafa Çelebi ve es-Seyyid Yakub Çelebi ve es-Seyyid Abdurrahman Çelebi ve merkūm Şerban zimmî mersûm Londi zimmîye bî-vech mu‘ârazadan men‘ olundukları huzûr-ı âlîlerine i‘lâm olundu. Fî-selhi Cumâdelâhire sene 1162