Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 249 Hüküm no: 257 Orijinal metin no: [34a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın alacak iddiasıyla boşandığı kocası Halil Çavuş’a açtığı davada haksız bulunduğu Ma‘rûz Dîvân-ı âlî çavuşlarından Halil Çavuş’un hasmı ve zevcesi Fâtıma bt. Abdullah nâm hatun zât-ı ba‘de’t-ta‘rîfi’ş-şer‘î meclis-i şer‘-i hatîrde mezbûr Halil Çavuş muvâcehesinde mezbûr Halil Çavuş ile zevciyet beynimizde kāime iken malımdan ve yedimden yüz otuz guruş ikrâz ve teslîm eylediğimde ol dahi ber-vech-i muharrer istikrâz ve kabz ve kendi mesârifine sarfla istihlâk etmişidi hâlâ meblağ-ı mezkûru mezbûr Halil Çavuş’dan taleb ederim deyü da‘vâ eyledikde ol dahi cevâbında târih-i i‘lâmdan yirmi bir gün mukaddem mehr-i müecceli ve nafaka-i iddeti ve meûnet-i süknâsı kendi üzerine olmak üzere ba‘de’l-muhâla‘a ve’l-kabûl hukūk-ı zevciyete ve târih-i kitâba gelince sâir beynlerinde cârî âmme-i ahz u i‘tâya müte‘allika âmme-i da‘vâdan herbirimiz âharın zimmetini ibrâ ve ıskāt edip herbirimiz dahi âharın ibrâsını kabûl ve tasdîk etmişidik deyü takrîr-i meşrûhuna mutâbık ibrâz eylediği bir kıt‘a muhâla‘a hüccetinin mazmûnunu müdde‘iye-i mezbûre Fâtıma Hatun ikrâr etmeğin mûcebince müdde‘iye-i mezbûre Fâtıma meblağ-ı mezkûr yüz otuz guruş mutâlebesiyle bî-vech-i şer‘î mezbûr Halil Çavuş’a mu‘ârazadan men‘ olunduğu Bâb’dan huzûr-ı âlîlerine i‘lâm olundu. Fî 11 Recebi’l-ferd sene 1162