Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 249 Hüküm no: 256 Orijinal metin no: [34a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koğacı esnafının, kethudaları Hüseyin b. Veliyüddin’in idaresinden memnun oldukları, Ahmed ve Mehmed ustaların ise nizama aykırı tavır ve hareketleri olduğunu beyan ettikleri Ma‘rûz Mahmiye-i İstanbul’da Koğacılar hirfetinin ustaları el-Hâc Mustafa b. Ali ve Hasan Ağa b. Ali ve İsmail Çelebi b. Hasan ve Mehmed b. Ömer ve Mustafa Çelebi b. Abdullah ve el-Hâc Ahmed Ağa b. el-Hâc Mustafa ve Halil Çelebi b. İbrahim ve Mehmed b. Hasan ve İbrahim b. Ali ve Mehmed b. Hüseyin ve Mehmed b. el-Hâc Mustafa ve el-Hâc Süleyman b. Ahmed ve Mehmed b. Mustafa ve yiğitbaşıları Mustafa Çelebi b. İsmail nâm kimesne[ler] meclis-i şer‘-i hatîrde hâlâ kethudâları el-Hâc Hüseyin b. Veliyüddin muvâcehesinde ve hirfet-i mezkûreden el-Hâc Ahmed b. İbrahim hazır olduğu hâlde işbu kethudâ-yı mezkûr el-Hâc Hüseyin hâlâ hirfetimiz ricâlinin kethudâsı olup ve kethudâlığı dahi müddet-i medîde olup ve mezbûrun müddet-i kethudâlığında hirfetimiz ricâlinin fukarâ ve ağniyâsına kat‘a hilâf-ı şer‘-i enver ve mugāyir-i nizâm-ı kadîm te‘addî ve tecâvüzlüğü zuhûr etmeyip cümlemiz beynlerinde san‘at-ı mezkûremizin kadîmî nizâmı üzere ta‘dîl ve tesviye eder olmağla mezbûrun bu vechile evzâ‘ ve etvâr ve sîret ve hareketinden cümlemiz hoşnûd ve râzılar ve şâkirleriz deyü kethudâ-i mezkûrun hüsn-i hâlini ve yine hirfet-i mezkûre ustalarından hâzır-ı mezbûr el-Hâc Ahmed ile gāib ani’l-meclis Lengerli Mehmed b. Mustafa nâm kimesneler öteden beri kendi hâllerinde olmayıp müfsid ve hîlekârlar olup nizâm-ı kadîmimize muhîl işlerde bulunup ve hirfetimiz ustalarının dahi beynlerine tefrika ve ihtilâl verirler deyü mezbûrânın sû’-i hâllerini haber verdikleri Mahkeme-i Bâb’dan huzûr-ı âlîlerine i‘lâm olundu. Fî 8 Receb sene 1162