Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 252 Hüküm no: 261 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ali’nin, Mustafa Çavuş’da olan alacağının ödenmesine yapılan tenbih Ma‘rûz Sahib-i arzuhâl Hüseyin b. Ali meclis-i şer‘-i hatîrde sipâh çavuşlarından Hüseyin Çavuş mübâşeretiyle ihzâr ettirdiği Mustafa Çavuş muvâcehesinde mezbûr Mustafa Çavuş zimmetinde cihet-i karzdan dört guruş ile eşyâ-i memlûkemden mecmû‘u on sekiz guruş otuz para kıymetli sarı çukaya kaplı bir tilki paçası kürk ve bir çuka çakşır ve bir ibrişim kuşağımı bi-gayr-ı hakkın ahz etmekle mevcûde ise a‘yânını müstehleke ile [ise] kıymet-i mezkûreleri olan on sekiz guruş otuz para ile dört guruş ki cem‘an yirmi iki guruş otuz para hakkımı mezbûr Mustafa Çavuş’dan taleb ederim deyü ba‘de’d-da‘vâ ve’s-suâl mezbûr Mustafa Çavuş cevâbında eşyâ-i mezkûreleri ve cihet-i karzdan dört guruş ahzını ikrâr lâkin eşyâ-i mezkûreleri istihlâk eylediğini ve kıymetleri ancak beş guruşdur deyü mâ‘adâyı inkâr ettikde müdde‘î-i mezbûr ziyâde kıymetlerini beyâna kādir olmayıp bi’t-taleb mezbûr Mustafa Çavuş’a yemîn teklîf olundukda ol dahi nükûl etmeğin mûcebince meblağ-ı mecmû‘-ı mezkûr yirmi iki guruş otuz parayı müdde‘î-i mezbûr Hüseyin’e edâ ve teslîmle merkūm çavuşa tenbîh olunduğu Bâb’dan huzûr-ı âlîlerine i‘lâm olundu. Fî 13 Receb sene 1162