Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 254 Hüküm no: 265 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakullukçu Ali Beşe’nin, İbrahim Çelebi’ye olan borcunu ödemesine yapılan tenbih Ma‘rûz Kullukçu Boşnak Mustafa Beşe mübâşeretiyle Bâb Mahkemesi’ne ihzâr olunan Dergâh-ı âlî cebecilerinin on birinci bölük karakullukçularından es-Seyyid Ali Beşe’nin hasmı Langa Yenikapısı sermâyecilerinden es-Seyyid el-Hâc İbrahim Çelebi meclis-i şer‘-i hatîrde mezbûr es-Seyyid Ali Beşe muvâcehesinde mezbûr es-Seyyid Ali Beşe bundan akdem zimem-i nâsda olan hukūkumu ahz u kabza yazıcım olup târih-i i‘lâmdan üç ay mukaddem mezbûr es-Seyyid Ali Beşe ile hesâb ve kitâbımızı huzûr-ı Müslimînde rü’yet eylediğimizde ba‘de ihrâci’l-mesârif otuz beş bin akçe hakkım zuhûr edip ve meblağ-ı mezbûr bana vâcibü’l-edâ deyni olduğunu huzûr-ı Müslimînde ikrâr-ı kat‘î ile ikrâr ve Müslimîni işhâd dahi etmekle hâlâ meblağ-ı mezkûr otuz beş bin akçe hakkımı mezbûr es-Seyyid Ali Beşe’den taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını ahrâr-ı ricâl-i Müslimînden lede’t-tezkiye adâletleri zâhir olan Hüseyin Beşe b. İsmail ve Ömer Yazıcı b. Mehmed nâm kimesneler şehâdetleriyle mezbûr Karakullukçu es-Seyyid Ali Beşe muvâcehesinde vech-i şer‘î üzere isbât etmeğin mûcebince meblağ-ı mezkûr otuz beş bin akçeyi müdde‘î-i mezbûr es-Seyyid el-Hâc İbrahim Çelebi’ye edâ ve teslîme mezbûr es-Seyyid Ali Beşe’ye tenbîh olunduğu huzûr-ı âlîlerine i‘lâm olundu. Fî 14 Recebi’l-ferd sene 1162