Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 254 Hüküm no: 264 Orijinal metin no: [35a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa’ın boşandığı hanımı Zeyneb bt. Abdullah’da bazı eşyaları ile alacağı olduğu iddiasıyla açtığı davada haksız bulunduğu Ma‘rûz Derûn-ı arzuhâlde mezkûrü’l-ism el-Hâc Mustafa meclis-i şer‘-i hatîrde zâtı ta‘rîf-i şer‘î ile mu‘arrefe olan zevce-i mutallakası sahibe-i arzuhâl Zeyneb bt. Abdullah muvâcehesinde mezbûre Zeyneb mukaddemâ zevciyet beynimizde kāime iken eşyâ-i memlûkemden bir çift altın bilezik ve bir çift habbe küpe ve iki sîm kuşak ve bir sîm yüzük ve bir altın yüzük ve bir sincab kürk ve iki çârşeb ve iki top bez ve bir donluk bez ve bir şâlî anteri ve bir zıbun ve bir beyaz cebe ve dört uçkur ve on bir yağlık ve altı yemenî ve bir peşkir-i kebîr ve üç aş makramesi ve bir bürüncük gömlek ve bir beyaz çintiyan ve bir beyaz don ve bir peştemal ve bir silecek ve bir boğça ve bir fesim ile üç Macar altını ve üç Mısır zencirlisi altınımı li-ecli’l-hıfz îdâ‘ ve teslîm etmişidim hâlâ taleb ve istirdâd ederim deyü da‘vâ eyledikde ol dahi cevâbında eşyâ-i mezkûrenin istid‘â ve kabzını inkârından mâ‘adâ mezbûr el-Hâc Mustafa benimle târih-i i‘lâmdan iki ay mukaddem mehr-i müeccelim ile nafaka-i iddetim üzerlerine ve meûnet-i süknâm dahi kendi üzerime olmak üzere ba‘de’l-muhâ[la‘a] ve’l-kabûl herbirimiz hukūk-ı zevciyete ve sâire müte‘allika âmme-i da‘vâdan âharın zimmetini ibrâ eylediğimizde âhar [ol] dahi ibrâ-i mezkûru kabûl ve tasdîk etmişidi deyü olan def‘ini mezbûr el-Hâc Mustafa ikrâr etmeğin mûcebiyle müdde‘î-i mezbûr el-Hâc Mustafa bî-vech-i şer‘î da‘vâ-yı mezkûresiyle mezbûre Zeyneb’e mu‘ârazadan men‘ olunduğu huzûr-ı âlîlerine i‘lâm olundu. Fî 8 Recebi’l-ferd sene 1162