Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 255 Hüküm no: 267 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye Ayşe bt. Abdullah’ın, Esirci Hüseyin Beşe b. Yusuf’a açtığı hürriyet davasından vazgeçtiği Ma‘rûz Orta boylu açık kaşlı kara gözlü Âişe bt. Abdullah Mumcu Mehmed Beşe mübâşeretiyle Bâb Mahkemesi’ne ihzâr olunan hasmı Esirci Hüseyin Beşe b. Yusuf b. Abdullah’ın vekîl-i sâbitü’l-vekâlesi İbrahim mahzarında ben Kars-ı Erzurum kazâsına tâbi‘ Möküzi nâm karye ahâlîsinden Osman nâm kimesnenin firâşından hâsıla ve zevcesi Ümmühani nâm hatundan mütevellide olup bana ve ebeveynime kat‘a rık târî olmuş değil iken müvekkil-i mezbûr Hüseyin Beşe bana Gürciyyetü’l-asl câriyesi olmak üzere vaz‘-ı yed eder suâl olunup sebîlim tahliye ve kasr-ı yedine tenbîh olunmak matlûbumdur deyü da‘vâya tesâddî etmemle lâkin ben bazı kimesnelerin iğvâsıyla ber-vech-i muharrer da‘vâ-yı hürriyete tesâddî etmişidim hâlâ ben ber-minvâl-i meşrûh müvekkil-i mezbûr Hüseyin Beşe’nin yedinde müşterâ câriye-i memlûkesiyim deyü ikrâr ve i‘tirâf eylediği huzûr-ı âlîlerine i‘lâm olundu. Fî 14 Receb sene 1162