Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 256 Hüküm no: 268 Orijinal metin no: [35b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak davasının reddedildiği Ma‘rûz Cüllâhân esnâfından Karabet v. Bogos ve Agop v. Abram nâm zimmîler meclis-i şer‘de esnâf-ı mezkûre kethudâsı Mehmed b. Abdülgani ve ihtiyârlarından Ali b. Nebi ve Hamza b. Cum‘a ve Mustafa b. Halil ve Ali b. Mehmed ve Abdullah b. Mehmed mahzarlarında bundan akdem bir husûsun temşiyeti’çün zâbitlere yirmi yedi guruş ile yirmi altı para harc u sarf eyledik deyü bizden taleb eylediklerinde biz dahi esnâf-ı mezkûre zimmîlerinden meblağ-ı mezbûru cem‘ ve tahsîl ve esnâfımız ihtiyârlarına verdiğimizde harc u sarflarının aslı olmayıp kendilerde kalmağla taleb ederiz deyü ba‘de’d-da‘vâ ve’l-inkâr merkūmân zimmîler meblağ-ı mezbûru verdikleri kimesneyi ta‘yîn edememekle da‘vâlarını tashîhe kādir olmamalarıyla iltifât olunmayıp ve merkūmân zimmîler kendi hâllerinde olmayıp cümleye muhâlefet ve umûrumuza müdâhale ve rencîde ve ta‘cîz ile esnâfımızın ihtilâline bâ‘is olmalarıyla râhatımız yokdur deyü kethudâ-yı mezbûr ile zikrolunan ihtiyârlar ber-vech-i muharrer mezbûrân zimmîlerden teşekkî ve umûrlarına müdâhale ve karışmamak üzerine tenbîh olunmak murâdımızdır dediklerinde ber-vech-i meşrûh merkūmân Agop ve Karabet zimmîlere tenbîh olunduğu mübâşirleri Mumcu el-Hâc Hüseyin iltimâsıyla huzûr-ı âlîlerine i‘lâm olundu. Fî 14 Receb sene 1162