Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 261 Hüküm no: 279 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Abdullah’ın, daha önce tasarrufunda olan kiracısı olduğu vakıf evin satışının iptal edilip kendisine teslim edilmesi talebiyle İsmihan Hatun Vakfı mütevellisi Mehmed b. Ali’ye açtığı davanın reddedildiği Ma‘rûz Zâtı ta‘rîf-i şer‘î ile mu‘arrefe olan Rahime bt. Abdullah meclis-i şer‘-i hatîrde Mehmed b. Ali muvâcehesinde merhûme İsmihan Hatun Vakfı mütevellîsi vekîli ve vakf-ı mezbûrun câbîsi Mehmed Çelebi b. Mustafa hazır olduğu hâlde târih-i i‘lâmdan on sene mukaddem benim vakf-ı mezbûr müstagallâtından bi’l-icâreteyn tasarrufumda olan mahmiye-i İstanbul’da Öküz Mehmed Paşa Câmi‘-i şerîfi civârında vâki‘ tasarrufunda olan ma‘lûmü’l-hudûd ve’l-müştemilât bir bâb vakıf menzilimi işbu hazır bi’l-meclis oğlum Molla Ahmed benim gıyâbımda ve benim iznimsiz fuzûlî nısfını işbu mezbûr Mehmed’e ve nısf-ı âharını dahi gāib ani’l-meclis kızım Emine Hatun bt. Ali’ye elli guruş bedel-i makbûz mukābelesinde bâ-ma‘rifet-i mütevellî ba‘de’l-ferâğ ve’t-tefvîz bedel-i meblağ-ı mezkûru getirip bana def‘ ve teslîm ben dahi ahz ve istihlâk etmişidim ancak ferâğ-ı mezkûr benim gıyâbımda ve iznimsiz olmağla hâlâ menzil-i mezbûru ma‘rifet-i mütevellî ile taleb ve istirdâd ederim deyü olan da‘vâsı takrîr-i meşrûhu üzere sahîha olmamağla hasmı merkūma şer‘an suâl teveccüh etmeyip müdde‘iye-i mezbûre bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 16 Recebi’l-ferd sene 1162