Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 261 Hüküm no: 278 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Beşe b. Mustafa’nın cariyesi Ahıskalı Hurum’un hür olduğunu ispat ettiğinden kendisinin ve küçük kızı Ayşe’nin serbest bırakıldığı Ma‘rûz Rıkkıyete sebk-i inkıyâdı olmağla taraf-ı şer‘-i enverden ber-vech-i âtî da‘vâya me’zûne olan orta boylu açık kara kaşlı kara gözlü Hurum nâm Nasrâniye meclis-i şer‘-i enverde kendiye rakīkası olmak üzere vâzı‘u’l-yed olup Mumcu Mehmed Beşe mübâşeretiyle ihzâr-ı şer‘ olunan yirmi dokuz bölük yoldaşlarından Veli Beşe b. Mustafa muvâcehesinde ben vilâyet-i Anadolu’da Ahıska kazâsına tâbi‘ Canbazlı nâm karye re‘âyâsından Manuk v. Sadovi nâm zimmînin firâş-ı sahîhinden hâsıla ve zevce-i menkûhası Benar bt. Kirkor nâm zimmiyeden mütevellide olup ebeveynim mesfûrândan birine rık târî olmamış ben ve yedimdeki işbu sadriye sagīre kızım Âişe’den herbirimiz hürretü’l-asl iken mezbûr Veli Beşe bizlere bi-gayr-ı hakkın rakīkaları olmak üzere vaz‘-ı yed eder üzerimizden yed-i âdiyesi ref‘ ve izâle ve sebîlimiz tahliyesiyle tenbîh taleb ederim deyü ba‘de’d-da‘vâ ve’s-suâl mezbûr Veli Beşe cevâbında fi’l-vâki‘ müdde‘iye-i mevsûfe-i mezkûreye târih-i i‘lâmdan bir buçuk sene mukaddem Gürcistan’da Andi nâm karyede Mustafa nâm kimesneden yedinde Gürciyyetü’l-asl câriyesi olmak üzere yüz otuz dört guruşa müşteriye-i câriye-i memlûkemdir deyü vaz‘-ı yedini ikrâr lâkin ber-vech-i muharrer hürriyetini inkâr etmeğin müdde‘iye-i mevsûfe-i mezkûre müdde‘âsını ahrâr-ı ricâl-i Müslimînden ve mârrü’z-zikr Canbazlı karyesi ahâlîsinden İstanbul’da Paşakapısı’nda Hancı Hasan b. Mustafa ve Tuz Paşa biraderi silâhşör ağa menzilinde sâkin Ali b. Ahmed nâm kimesneler şehâdetleriyle mezbûr Veli Beşe muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hükmolunup müdde‘iye-i mevsûfe-i mezkûre Hurum ile sadriye sagīre kızı Âişe’den kasr-ı yed ve sebîlleri tahliyesiyle mezbûr Veli Beşe’ye tenbîh olunduğu Bâb’dan huzûr-ı âlîlerine i‘lâm olundu. Fî 16 Receb sene 1162