Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 271 Hüküm no: 296 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri Veli Beşe b. Mustafa’nın cariyesi Hurum’u Dağıstan’da Hacı Mehmed Ali b. Hacı Ramazan’dan satın aldığı iddiasıyla açtığı davanın cariyenin daha önce hürriyetini ispat etmesinden dolayı reddedildiği Ma‘rûz Diyâr-ı Kırım’da Taman kal‘ası ahâlîsinden ve Dergâh-ı âlî yeniçerilerinin yirmi dokuz bölük yoldaşlarından Veli Beşe b. Mustafa meclis-i şer‘-i hatîrde Anadolu’da Dağıstan hüccâcından mahrûse-i Galata’da Arab Hanı’nda müsâfiren sâkin olup mumcu mübâşeretiyle ihzâr-ı şer‘ olunan el-Hâc Mehmed Ali b. el-Hâc Ramazan muvâcehesinde târih-i i‘lâmdan on bir gün mukaddem yedimde mülküm olmak üzere vâzı‘u’l-yedi iken muvâcehemde işbu Bâb Mahkemesi’nde Anadolu’da Ahıska kazâsına tâbi‘ Canbazlı karye re‘âyâsından Fanik v. Sador zimmînin zevce-i menkûhası Teyar bt. Kirkor zimmîden mütevellide sulbiye kızı olup hürretü’l-asl olduğunu isbât eden orta boylu açık kara kaşlı kara gözlü Hurum nâm Nasrâniyeyi Dağıstan’da işbu mezbûr el-Hâc Mehmed Ali’den semen-i ma‘lûma iştirâ etmişidim deyü olan da‘vâsı mukaddemâ mevsûfe-i mezkûrenin isbât-ı hürriyetinde mevsûfe-i müdde‘iye-i mezkûreyi târih-i kitâbdan bir sene mukaddem Gürcistan’da Andi nâm karyede Mustafa nâm Lezgi’den yüz otuz dört guruşa iştirâ ve kabz eyledim deyü tescîl-i şer‘î olunan cevâbında münâkız olmağla hasbe’ş-şer‘i’l-enver da‘vâsı sahîha olmamağın hasm-ı mezbûra şer‘an suâl dahi teveccüh etmeyip müdde‘î-i mezbûr Veli Beşe bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 27 Recebi’l-ferd sene 1162