Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 269 Hüküm no: 295 Orijinal metin no: [38a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe ve Rukiye bt. Yahya Efendi’nin, anneleri tarafından Mehmed, Mustafa, Hüseyin ve Hasan kardeşlere satılan eve babalarının ölmeden önce yaptığı masraflarının kendilerine ödenmesi talebiyle açtıkları davada sulh yoluyla anlaştıkları Bâ-mühr-i hazret-i efendi Ma‘rûz Sâdır olan fermân-ı âlîlerine imtisâlen derûn-ı arzuhâlde mezkûr husûsun mahâllinde keşf ve istimâ‘ı’çün kıbel-i şer‘-i enverden me’zûnen irsâl olunan Başkâtib Mevlânâ Ömer Efendi dâ‘îleri hâssa mi‘mârlardan Hüseyin Halîfe ve Ali Halîfe ile derûn-ı arzuhâlde mezkûr Cevvîzâde mahallesi civârında Simkeş Hacı Sinan mahallesinde ma‘lûmü’l-hudûd menzile varıp huzûr-ı Müslimînde akd-i meclis-i şer‘-i enver eyledikde arzuhâl sahibeleri Âişe ve Rukiye bintey Yahya Efendi b. Mustafa nâm hatunlar taraflarından husûs-ı âti’z-zikre vekîlleri olduğu Mehmed Ağa b. Ali ve Ali b. İbrahim şehâdetleriyle hasm-ı câhid muvâcehesinde nehc-i şer‘î üzere sâbit olan mezbûre Rukiye’nin zevci el-Hâc Mehmed b. Mehmed meclis-i ma‘kūd-ı mezkûrda menzil-i mezkûra bi’ş-şirâ vâzı‘u’l-yed olan Mehmed ve Mustafa ve Hüseyin ve Hasan benû Mehmed nâm kimesnelerden mezbûrûn Mehmed ve Mustafa ve Hüseyin asâleten ve mezbûr Hasan’ın li-ebeveyn kız karındaşı ve tarafından husûs-ı âti’z-zikre vekîl-i sâbitü’l-vekâlesi olup zâtı ta‘rîf-i şer‘î ile mu‘arrefe olan Fâtıma Hatun vekâleten muvâcehelerinde menzil-i mezkûrun sahibe-i evvelîsi olup bâyi‘ası Âişe nâm hatun dahi hâzıra olduğu hâlde işbu menzil-i mezkûr mukaddemâ hâzıra-i mezbûre Âişe Hatun’un yedinde mülkü iken mezbûre Âişe’nin sadrî oğlu olup müvekkiletânım mezbûretânın babaları olan müteveffâ Yahya Efendi hayatında kendi nefsi’çün anası hâzıra-i mezkûrenin izniyle [38b] malından altı yüz guruş sarf edip menzil-i mezkûr dâhilinde müceddeden üç bâb oda ve hâriciyesini meremmât ve mahlûten bir bâb oda dahi binâ edip ba‘dehû fevt olup verâseti anası hâzıra-i mezbûre ve zevcesi Hadîce Hatun ve kızları müvekkiletânım mezbûretâna münhasıra olmağın hâlâ müvekkiletânım mezbûretânın menzil-i mezkûrda olan babaları müteveffâ-yı mezbûrun binâ ve ta‘mîrinden hisselerini taleb ederim deyü da‘vâ ve müşterûn-ı mezkûrûn dahi cevâblarında müteveffâ-yı mezbûr Yahya Efendi’nin menzil-i mezkûrda binâ ve meremmâtını külliyyen inkârlarından mâ‘adâ mezbûr Yahya Efendi müflisen fevt olmağla anası bâyi‘a-i hâzıra-i mezbûre Âişe Hatun oğlu müteveffâ-yı mezbûrun bi’l-emr ve’l-kabûl kefâletiyle beş yüz elli guruş deynini dahi edâ etmişidi deyü def‘ sadedinde olup ol vechile beynlerinde ba‘de vukū‘ı’l-münâza‘ât bâ-vesâtet-i muslihîn vekîl-i mezbûr el-Hâc Mehmed bi’l-vekâle müdde‘âsından müşterûn-ı mezbûrûn Mehmed ve Mustafa ve Hüseyin ve vekîl-i mezbûre Fâtıma ile an-inkâr seksen guruş bedel-i makbûza sulh olup müvekkiletân-ı mezbûretânın babaları müteveffâ-yı mezbûr Yahya Efendi’nin menzil-i mezkûrda olan meremmât ve binâsına ve masrûfâtına müte‘allika âmme-i da‘vâdan müşterûn-ı mezbûrûn Mehmed ve Mustafa ve Hüseyin ve Hasan’ın zimmetlerini ibrâ-i âmm-ı kātı‘u’n-nizâ‘la bi’l-vekâle ibrâ ve ıskāt eylediğini mevlânâ-yı mezbûr mahâllinde ketb ü tahrîr ve ba‘dehû ma‘an ba‘s olunan ümenâ-i şer‘-i enver ile gelip alâ-vukū‘ihî meclis-i şer‘-i şerîfe inhâ eylediği huzûr-ı âlîlerine i‘lâm olundu. Fî 20 Recebi’l-ferd sene 1162