Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 272 Hüküm no: 298 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sara bt. İsayi’nin ölmeden önce kızı İva’ya sattığı evde hak iddia eden diğer varisler Latafi, Gordiye ve Avanis’in iddialarında haksız bulunduğu Ma‘rûz İstanbul’da Kızkapısı dâhilinde Abdi Subaşı mahallesi mütemekkinelerinden iken bundan akdem hâlike olan Sara bt. İsayi Nasrâniye’nin sadrî kebîr oğulları Lütfi ve Gordiye ve Avanis zimmîler meclis-i şer‘-i enverde hâlike-i mesfûrenin sadriye kebîre kızı İva Nasrâniye’nin zevci ve tarafından husûs-ı âti’z-zikrde husûmete vekîl-i sâbitü’l-vekâlesi olan Ariton v. Andon zimmî muvâcehesinde hayatında anamız hâlike-i mesfûre Balat’da vâki‘ Ermeni kilisesinin avârızı vakfından bi’l-icâreteyn tasarrufunda olup mârrü’z-zikr Abdi Subaşı mahallesinde etrâf-ı erba‘adan Arayıcı menzili ve Benli Sarrâf menzili ve tarîk-ı âm ile mahdûd ma‘lûmü’l-müştemilât menzilini mütevellîsi ma‘rifetiyle kızı müvekkile-i mesfûre İva’ya eylediği ferâğı maraz-ı mevtinde olup ve maraz-ı mevtde vârise vasiyyet ve temlîk sahîh olmamağla menzil-i mezkûrdan herbirimizin hisselerinden müvekkile-i mesfûrenin kasr-ı yediyle vekîl-i merkūma tenbîh taleb ederim deyü olan da‘vâlarında zikrolunan menzil vakıf olmağla tasarrufu için mütevellîsinin izin ve temessüğüyle mu‘teber ve tâm olup anaları mesfûrenin menzil-i mezkûru ferâğında mütevellîsinin izin temessüğü olduğunu takrîr-i meşrûhları üzere müdde‘ûn-ı mezkûrûn dahi ikrâr etmeleriyle şer‘an vekîl-i mesfûra bi’l-vekâle suâl dahi teveccüh etmeyip müdde‘ûn-ı mezkûrûn bî-vech-i şer‘î mu‘ârazadan men‘ olundukları Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 24 Recebi’l-ferd sene 1162