Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 274 Hüküm no: 302 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurtçu Osman b. İsmail’in, sokak aralarında süt satan esnafa tahsis edilen Müderris köyü mandıralarından süt satın almaktan menedildiği Ma‘rûz Mahmiye-i İstanbul’da at ile esvâkda süd gezdirip ibâdullâha bey‘ edici tâifenin yiğitbaşıları Velo v. Biho ve ustalarından Dimo v. Lutu zimmîler meclis-i şer‘-i enverde mahmiye-i mezbûrede Nahılbend mahallesi sâkinlerinden kendi menzilinde yoğurtçuluk işleyen Osman b. İsmail muvâcehesinde yoğurtçu tâifesinin yiğitbaşıları Hasan Beşe b. Receb dahi hazır olduğu hâlde öteden beri yoğurtçu esnâfının süd iştirâ eyledikleri mandıraları başka ve bizim süd iştirâ eylediğimiz mandıralar başka ve mu‘ayyen ve mümtâz olup ve herbirimiz âhara ta‘yîn olunan mandıralara müdâhale etmemek üzere nizâm-ı kadîmimiz olup ve ber-vech-i muharrer yedimize taraf-ı şer‘-i hatîrden hüccet-i şer‘iye dahi verilmişiken mezbûr Yoğurtçu Osman nizâm-ı mezkûra mugāyir ber-mantûk-ı hüccet-i mezkûre bizlere ta‘yîn olunan Müderris karyesi mandırasının südünü ahz eder kasr-ı yedine tenbîh taleb ederiz deyü takrîr-i meşrûhuna mutâbık bir kıt‘a hüccet-i şer‘iye ibrâzıyla ba‘de’d-da‘vâ ve’s-suâl merkūm Yoğurtçu Osman cevâbında mandıra-i mezkûreden süd aldığını ikrâr ancak nizâm-ı mezkûra ittibâ‘an fîmâ-ba‘d almamağa ta‘ahhüd edip ol vechile kat‘-ı nizâ‘ ettikleri Mahkeme-i Bâb’dan huzûr-ı âlîlerine i‘lâm olundu. Fî 28 Receb sene 1162