Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 274 Hüküm no: 301 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ahmed’den üç talakla boşanmış olan Hatice bt. Abdullah’ın ikinci kocası Mehmed b. Hüseyin’den de boşanıp iddeti sona erdiğinden ilk kocasıyla tekrar nikahlanabileceği Ma‘rûz İstanbul’da Mesîh Hasan Paşa mahallesi sâkinelerinden mukaddemâ es-Seyyid Ahmed b. es-Seyyid Ahmed nâm kimesnenin talâk-ı selâse ile mutallakası olan Hadîce bt. Abdullah’ın mezbûr es-Seyyid Ahmed’den iddeti ba‘de’l-inkızâ nefsini gāib ani’l-meclis Mehmed b. Hüseyin nâm kimesneye ba‘de’t-tezvîc ve’d-duhûl ve’l-halvetü’s-sahîha gāib-i mezbûrun dahi mezbûre Hadice’yi tatlîk ve hâlâ zevc-i sânîden dahi iddeti münkaziye olduğunu zevc-i evveli mezbûr es-Seyyid Ahmed huzûrunda mahalle-i mezbûre imâmı Hâfız Ahmed Efendi b. el-Hâc Osman ve Müezzin Hasan b. Ali nâm kimesneler ihbâr eylediklerinde zevc-i evvel-i mezbûr es-Seyyid Ahmed mutallakası mezbûreyi zevc-i sânî bana duhûl etti deyü olan kavlini tasdîk etmekle sânînin tasdîk ve tekzîbine iltifât olunmayıp mezbûre Hadîce kavl-i mezkûrunda kâzibe olmadığına tahlîf olunmağla yedinde fetvâ-yı şerîfe mantûkunca zevc-i evvel-i mezbûra akdi helâl olduğu Mahkeme-i Bâb’dan huzûr-ı âlîlerine i‘lâm olundu. Fî 25 Recebi’l-ferd sene 1162