Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 291 Hüküm no: 331 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzili usule uygun olarak kiraladığı tespit edilen Âmine bt. Halil’in menzili boşaltıp vakfa teslim etmesi Bâ-mühr-i hazret-i efendi Ma‘rûz Târih-i i‘lâm şehri gurresinde derûn-ı arzuhâlde mezkûr husûsun mahâllinde keşf ve istimâ‘ı’çün sâdır olan fermân-ı âlîye imtisâlen kıbel-i şer‘-i enverden me’zûnen bi’l-hükm irsâl olunan Başkâtib Mevlânâ Ömer Efendi dâ‘îleri hâssa mi‘mârlardan Süleyman Halîfe ve es-Seyyid Mehmed Halîfe ile arzuhâlde mezkûr Üskübî İbrahim Çelebi mahallesinde merhûme Âmine Hatun’un zikri âtî vakıf menziline bi’l-evlâdiye ve’l-meşrûtiye mütevelliye olan fahrü’l-muhadderât Havva Hanım bt. Çelenk Mehmed Paşa’nın menziline varıp huzûr-ı Müslimînde akd-i meclis-i şer‘-i âlî eyledikde zâtı Ali Ağa b. Murtaza ve Çukadâr Mehmed Ağa b. Ali ta‘rîfleriyle mu‘arrefe olan mûmâ-ileyhâ Havva Hatun meclis-i ma‘kūd-ı mezkûrda mahalle-i mezkûre sâkinelerinden Atike bt. Mehmed’in sadriye kebîre kızı ve tarafından husûs-ı âtîde husûmete vekîli olduğu zâtını ârifân Hacı Salih b. Receb ve Teberdâr İsmail Ağa b. Abdullah şehâdetleriyle sâbit olup zâtı şâhidân-ı mezkûrân ta‘rîfleriyle mu‘arrefe olan Âmine bt. Halil muvâcehesinde müderrisîn-i kirâmdan Yusuf Efendizâde Abdülhalim Efendi hazır olduğu hâlde vâkıfe-i mezkûrenin süknâ ve tevliyetini evvelâ kendi nefsine ba‘dehâ anamın anası ceddem Âişe Hatun’a ba‘dehâ tevliyet ve galle ve tasarrufunu ceddem mezbûre Âişe’nin batnen ba‘de batnin ile’l-inkırâz evlâd-ı evlâd-ı evlâdına ve ba‘de’l-inkırâz kezâlik utekāsına şart edip ve hâlâ bi’l-meşrûtiye mütevelliyesi olduğum mahalle-i mezkûrede vâki‘ ma‘lûmü’l-hudûd ve’l-müştemilât menzilden bir tarafdan bakıye-i menzil-i mezkûr ve bir tarafdan ba‘zen Müezzin Hasan Çelebi ve ba‘zen Hüseyin Efendi menzilleri ve bir tarafdan tarîk-ı hâs ve bir tarafdan tarîk-ı âm ile mahdûd ma‘lûmü’l-müştemilât mahâllini ifrâz ve âhara îcâr esnâsında iken benim için hâcc-ı şerîfe azîmetim zuhûr etmekle mahâll-i müfrez-i mezkûru ancak beş kîse akçe bedel ile âhara îcâr edip noksan ile îcâr etmemek üzere vekîlim olan işbu hâzır-ı mezbûr Abdülhalim Efendi menzil-i müfrez-i mezkûru bedel-i mezkûrdan ve bedel-i mislinden noksan-ı fâhiş olan üç kîse akçeye Saray-ı atik-i âmire teberdârlarından Reşidzâde Feyzullah Halîfe’ye îcâr edip ve husûs-ı tevliyete dahi tevkîlim yoğiken menzil-i müfrez-i mezkûru mezbûr Feyzullah Halîfe’nin işbu vekîl-i mezbûre Âmine ile anası müvekkile-i mezbûre Atike’ye ferâğ ve kasr-ı yedinden menzil-i müfrez-i mezkûru tasarrufi’çün verdiği izni sahîh olmayıp ve hâlâ mezbûr Feyzullah dahi bilâ-veled fevt dahi olmağla vekîl-i mezbûre Âmine ve müvekkilesi merkūme Atike menzil-i müfrez-i mezkûrdan kasr-ı yed ve tahliye ve cânib-i vakfa red ve teslîmlerini bi’t-tevliye taleb ederim deyü olan da‘vâsında vekîl-i mezbûre Âmine’nin asâleten ve vekâleten cevâbında mütevelliye-i müdde‘iye-i mezbûre Havva Hanım işbu hâzır-ı mezbûr Abdülhalim Efendi’yi tarafından [43a] vakf-ı mezkûra kāimmakām-ı mütevellî nasb ve ber-vech-i muharrer yedine hüccet-i şer‘iye vermişidi deyü def‘ için ibrâz eylediği hüccet-i şer‘iyede mezbûr Abdülhalim Efendi’yi ancak menzil-i müfrez-i mezkûru bedel-i misli ile âhara îcâra vekâleti olup tevliyet kāimmakāmlığı ve rü’yet-i umûr-ı vakf kaydlarından biri olmamağla vekîl-i mezbûre Âmine’nin asâleten ve vekâleten def‘i sahîh olmayıp menzil-i müfrez-i mezkûrdan kasr-ı yed ve tahliye ve cânib-i vakf-ı mezkûra red ve teslîmle tenbîh iktizâ eyledikde mezbûre Âmine huzûr-ı âlîlerinde mürâfa‘a için fermân-ı âlî ibrâz etmeğin vâki‘-i hâli mevlânâ-yı mezbûr mahâllinde ketb ü tahrîr ve ba‘dehû ma‘an ba‘s olunan ümenâ-i şer‘-i enver ile gelip meclis-i şer‘-i şerîfe alâ-vukū‘ihî inhâ ve takrîr eylediğidir ki tâ‘aten li’l-emri’l-âlî huzûr-ı âlîlerine i‘lâm olundu. Fî 10 Şa‘bân sene 1162