Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 290 Hüküm no: 330 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David, Yasef ve diğer Yahudilerin nizama aykırı olarak mengene kurup mensucut perdaht etmekten menedildikleri, David’in ise uyarılara uymadığından cezalandırılması Bâ-mühr-i hazret-i efendi Ma‘rûz Sahibân-ı arzuhâl Ahmed Ağa ve Mustafa Ağa meclis-i şer‘de David v. Avram ve Yasef v. Şahin ve Hamrun v. Sabatay ve Salamon ve diğer David ve âhar David nâm Yahûdiler muvâcehelerinde derkenârda mezkûr olduğu vech üzere mecmû‘-ı mensûcât bizim mutasarrıf olduğumuz üç aded mengenede şürûtuyla perdaht olunup âhar mahâlde mengene ihdâsı ve emti‘a perdahtı külliyyen bâ-fermân-ı âlî memnû‘ iken işbu mesfûr David v. Avram Çukacılar Hanı’nda mütemekkin olduğu odada mugāyir-i hatt-ı hümâyûn mengene peydâ ve şâl ve şâlî ve sâir envâ‘-ı akmişeyi ateş perdahtı eylediğinden bundan akdem mersûm David meclis-i şer‘a ihzâr ve muvâcehesinde emr-i âlîşân kırâet ve mazmûn-ı münîfi üzere tenbîh-i ekîd olunduğu i‘lâm olunmuşidi mersûm bir vechile mütenebbih olmayıp işbu mu‘âyene olunan envâ‘-ı akmişe perdaht eder iken yedinde bulunup ve merkūmdan mâ‘adâ işbu mesfûrûn Yahûdiler dahi mütemekkin oldukları mahallerde mengene peydâ ve ateş perdahtı ederler ber-mûceb-i emr-i âlî men‘ <> olunmaları matlûbumuzdur deyü bir kıt‘a emr-i âlî ve i‘lâm ibrâz eylediklerinde gıbbe’s-suâl herbir[i] mengene i‘mâl eylediğini mukır ve mu‘terif olmalarıyla ber-mûceb-i emr-i âlî kat‘a mengene i‘mâl etmemek üzere herbirine tenbîh-i ekîd olunup lâkin mesfûr David v. Avram Yahûdî ba‘de’t-tenbîhi’ş-şer‘î hilâf-ı hatt-ı hümâyûn-ı şevket-makrûn ve mugāyir-i emr-i âlî hareketde ısrar ettiği’çün lâzım olan tedîbi re’y-i âsafânelerine ihâle olunduğu huzûr-ı âlîlerine i‘lâm olundu. Fî 10 Şa‘bân sene 1162