Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 293 Hüküm no: 334 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan ve Andreyas’ın kiracı oldukları vakıf dükkânlarının kira sözleşmelerinin yenilenmediğinden dükkânların boşaltılıp dükkânları kiralayan Biço v. Yogo’ya teslim etmeleri Bâ-mühr-i hazret-i efendi Ma‘rûz Sahib-i arzuhâl Biço v. Yogo nâm zimmî meclis-i şer‘de habbâz tâifesinden Çardaklı fırını ustası es-Seyyid el-Hâc Hasan ve Bali Paşa fırını ustası Andreyas muvâcehelerinde Kumkapı dâhilinde birbirine muttasıl Ayasofya-i Kebîr Vakfı müstagallâtından olan iki bâb dükkân mutasarrıfı mahlûlünden bi’l-icâreteyn bana îcâr ve tefvîz olunup mârrü’z-zikr dükkânların herbirinde işbu mezbûr es-Seyyid el-Hâc Hasan ve mesfûr Andreyas mutasarrıf-ı evvelinden istîcâr ile müşâhereten müste’cirler olup el-hâletü hâzihî cânib-i vakfdan bana tefvîz olunduğundan berü beynimizde tecdîd-i akd-i icâre olunmayıp herbiri dükkân-ı mezkûrlardan herbirine fuzûlî tasarruf etmeleriyle kasr-ı yedlerine ve ba‘de’t-tahliye bana teslîmlerine tenbîh olunmak matlûbumdur deyü ba‘de’d-da‘vâ ve’s-suâl herbiri ber-minvâl-i muharrer müşâhereten müste’cir olduğunu ve cânib-i vakfdan müdde‘î-i mersûm Biço zimmîye tefvîz olunduğunu ve ba‘de’t-tefvîz tecdîd-i akd-i icâre olunmadığını herbiri mukır ve mu‘terif olmalarıyla mûcebince herbirine mârrü’z-zikr dükkânları müdde‘î-i merkūma teslîme mezbûr es-Seyyid el-Hâc Hasan’a ve mesfûr Andreyas’a tenbîh olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 12 Şa‘bân sene 1162