Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 294 Hüküm no: 335 Orijinal metin no: [43a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Todo’nun nizama aykırı olarak sebze satmaktan menedildiği Bâ-mühr-i hazret-i efendi Ma‘rûz Sebzeci esnâfının kethudâları İsmail Çelebi ve yiğitbaşıları Hasan ve sâir mazbûtü’l-esâmî on neferden mütecâviz ustalar meclis-i şer‘a Mumcu Mustafa Beşe mübâşeretiyle ihzâr olunan Tanaş v. Todo zimmî muvâcehesinde mesfûr Tanaş saraçhâne kurbünde İbrahim Paşa Hamamı civârında bir mahalli bostan kapısı gibi açıp bostancılara mahsûs envâ‘-ı meyveyi bey‘a kanâ‘at etmeyip bize mahsûs olup âhar bey‘ ve şirâsından memnû‘ olan sebzeci metâ‘ını dahi bey‘a tesâddî ve nizâm-ı kadîmimizin külliyyen ihtilâline bâ‘is olur deyü takrîr-i meşrûhlarına mutâbık tuğrâ-yı garrâ ile mu‘anven bir kıt‘a emr-i âlîşân ve i‘lâm ibrâzıyla mesfûrdan teşekkî eylediklerinde gıbbe’s-suâl mesfûr Tanaş mahâll-i merkūmda sebzecilere mahsûs metâ‘ı bey‘ eylediğini mukır ve mu‘terif olmağın kendi bostancılık kârı ile kanâ‘at edip hilâf-ı nizâm-ı kadîm ve mugāyir-i fermân-ı âlî sebzecilere mahsûs metâ‘ı bey‘ ve şirâ etmeyip mazmûn-ı emr-i âlîşân ile amel ve hareket etmek üzere mesfûr Tanaş’a tenbîh-i ekîd olunduğu huzûr-ı âlîlerine i‘lâm olundu. Fî 13 Şa‘bân sene 1162