Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 294 Hüküm no: 336 Orijinal metin no: [43a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Baho’nun çerçi dükkânında bakkallık yapmaktan menedildiği Bâ-mühr-i hazret-i efendi Ma‘rûz Bakkāl esnâfının pazarbaşıları Mehmed Çelebi ve Ahmed Usta ve Molla Ahmed ve Mahmud Çelebi ve diğer Usta Ahmed ve zimmîlerden Nikola ve Trandafil ve Foti ve Yorgi ve Kostantin ve sahib-i arzuhâl Dimitri ve sâir mazbûtü’l-esâmî kimesneler meclis-i şer‘de çörenci Nikola v. Baho muvâcehesinde mesfûrun Samatya dâhilinde bir bâb çerçi dükkânı olup bizim esnâfımıza mahsûs dekâkîn bâ-fermân-ı âlî müte‘ayyin ve ma‘lûm ve ziyâde muhdes dükkân olmak bâ-fermân-ı âlî memnû‘ iken mesfûr mârrü’z-zikr çerçi dükkânını hilâf-ı emr-i âlî bakka[l] dükkânı eyleyip derûnunda Mengeş nâm bir Ermeni’ye bakkāllık ettirdip nizâm-ı kadîmimize ihtilâl verir deyü teşekkî eylediklerinde gıbbe’s-suâl mesfûr çörenci Nikola zimmî ez-kadîm [43b] dükkânının çerçi dükkânı olduğunu ve derûnunda Mengeşe nâm Ermeni’nin bakkāllık ettiğini ikrâr ve i‘tirâf etmeğin ber-mûceb-i emr-i âlîşân ve nizâm-ı kadîm dükkân-ı mezkûru kadîmî üzere çerçi dükkânı edip bakkāl dükkânı etmeyip ve mesfûr Mengeşe zimmîye ve gayra derûnunda bakkāllık ettirmemek üzere tenbîh-i ekîd olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 13 Şa‘bân sene 1162