Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 62 Hüküm no: 25 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaağaç Yalvaç kazasının Çarsaray köyü Camii hitabet cihetinin Süleyman, Mustafa ve Ömer’e iştiraken tevcihi Ma‘rûz, Karaağaç Yalvaç kazâsına tâbi‘ Çarsaray karyesi Câmi‘-i şerîfinin yevmî bir akçe vazîfe ile hitâbet ciheti es-Seyyid Yusuf Halîfe’nin üzerinde olduğu askerî rûznâmçesinden derkenâr olunmağla meâl-i arz [ve] derkenâra nazar ve bi’t-tahkīk iktizâsı i‘lâm olunmak bâbında sâdır olan fermân-ı âlîşâna imtisâlen karye-i mezbûre ahâlîsinden bu esnâda Der-aliyye’ye gelen bî-garaz erbâb-ı vukūfdan Arıkoğlu es-Seyyid Veliyüddin b. es-Seyyid Ali ve Hüseyinoğlu es-Seyyid Mehmed b. Abdullah nâm kimesneler meclis-i şer‘a celb ile keyfiyeti gereği gibi etrâfıyla suâl olundukda derûn-ı arzda tahrîr ve inhâ kılındığı üzere mezbûr Molla Yusuf’un fevti vâki‘ ve dârendegân-ı arz merkūmûn Süleyman ve Mustafa ve Ömer nâm kimesneler sulbî sahîh oğulları ve herbiri ehil ve muhtâr-ı cemâ‘at olduklarını alâ-tarîkı’ş-şehâde ihbâr etmeleriyle bu sûretde tekessür-i huddâm maddesinde edâ-yı hizmet fâidesi derkâr olduğuna nazaran cihet-i mezkûre babaları müteveffâ-yı mezbûrun mahlûlünden oğulları merkūmûna iştirâken tevcîh olunmak bâbında emr [ü] fermân. Fî 27 M sene [12]48