Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 62 Hüküm no: 24 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskişehir nâhiyesi Muttalib köyündeki Kulağuz Zaviyesi Vakfı zâviyedarı Seyyid Yakub Halîfe’nin vakfın gelirlerine müdahale etmemesi Sâdır olan fermân-ı âlîlerine imtisâlen işbu arzuhâl ve derkenârlar ve defter emîni izzetlü efendi bendelerinin arzına nazar olundukda Sultanönü sancağında Eskişehir nâhiyesinde Muttalib karyesinde vâki‘ Kulağuz Zâviyesi Vakfı’nın yevmî bir akçe vazîfe ile zâviyedârlığı es-Seyyid Yakub Halîfe’nin ve zâviye-i mezkûrenin tevliyeti dahi sahib-i arzuhâl Hâfız Mustafa’nın ve yine livâ-i mezbûrda Karacaşehir nâhiyesinde Kulağuz Zâviyesi Vakfı’ndan üç aded çiftlik mutasarrıflığı dahi yine sahib-i arzuhâl-i mezbûrun başka başka berat-ı âlîşân ile üzerlerinde iken zâviyedâr-ı mezkûr vazîfe-i mezkûresine kanâ‘at etmeyip müstagallât-ı vakfa müdâhale eylediğinden bahisle men‘i bâbında emr-i şerîf istid‘â olunduğu meâl-i arzuhâlden ve bu husûsa dâir Defter-i hâkānî muktezâsıyla amel olunmak bâbında Dîvân-ı hümâyûndan emr-i âlî sâdır olmuş olduğu derkenârdan müstebân ve defterhânesi keyfiyeti dahi Defterhâne-i âmireden ba‘de’l-ihrâc muktezâsı Defter-i hâkānî? emîn-i mûmâ-ileyh arz etmiş olmağla bu sûretde müstagallât-ı vakf mütevellî tarafından zabt [ve] mezrâ‘adâr ve zâviyedâr ve sâir bu misillü cihat mutasarrıfları vazîfe-i mu‘ayyenelerini mütevellîden almaları lâzım geleceği ma‘lûm-ı devletleri buyruldukda emîn-i mûmâ-ileyhin arzı mûcebince mukaddemâ sudûr eden emr-i âlî derciyle Anadolu Muhâsebesi’nden iktizâsı üzere emr-i âlîşân ısdârı bâbında fermân veliyyü’l-emrindir. Fî 5 S sene [12]48