Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 326 Hüküm no: 386 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ovayüzü kazasının Yaycılar köyünden Osman b. Mehmed’in, saray aşçılarından Hüseyin’in babası Bolu’da görevli İbrahim Bölükbaşı’nın kendisinden haksız yere aldığı paranın Aşçı Hüseyin’den tahsili talebiyle açtığı davanın reddedildiği Ma‘rûz Anadolu’da Bolu sancağında Ovayüzü kazâsına tâbi‘ Yaycılar nâm karye ahâlîsinden sahib-i arzuhâl es-Seyyid Osman b. es-Seyyid Mehmed Mahkeme-i Bâb’da meclis-i şer‘de fi’l-asl karye-i mezbûre ahâlîsinden olup Saray-ı hümâyûn aşçılarından Birinci Ali mübâşeretiyle ihzâr olunan derûn-ı arzuhâlde mezkûrü’l-ism Aşçı Hüseyin b. Hasan muvâcehesinde mezbûr Aşçı Hüseyin’in benim ile karye-i mezbûrede vâki‘ olan menzil yeri ve sâir arâzî da‘vâsı’çün Âsitâne-i sa‘âdet’de şer‘an mürâfa‘alarımız için Bolu voyvodasına hitâben ısdâr eylediği emr-i âlî ile târih-i i‘lâmdan yirmi bir gün voyvoda-i mezkûr tarafından İbrahim Bölükbaşı ve babası Hasan Ağa nâm kimesneler karye-i mezbûrede vâki‘ menzilime gelip beni Âsitâne’ye ihzâr etmemek için beni bi-gayr-ı hakkın elli iki guruşumu ahz etmelerine sebeb olmağla meblağ-ı mezbûr elli iki guruşu ben mezbûrândan almağa iktidârım [olmamağla] mezbûr Aşçı Hüseyin’den taleb ederim deyü tesâddî eylediği da‘vâsı takrîr-i meşrûhu üzere sahîha olmamağla mezbûr Aşçı Hüseyin’e şer‘an suâl dahi teveccüh etmeyip müdde‘î-i mezbûr bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 6 Şevval sene 1162