Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 325 Hüküm no: 385 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya’nın alacak iddiasıyla Meyancı Kostantin’e açtığı davayı ispat edemediği Ma‘rûz Arzuhâl sahibi Ağya zimmî meclis-i şer‘-i enverde derûn-ı arzuhâlde mezkûr Meyancı Kostantin zimmî muvâcehesinde bundan akdem gāib ani’l-meclis Süleymanzâde Mehmed Ağa’nın mahmiye-i İstanbul’da Şehzâdebaşı’nda vâki‘ lede’l-ahâlî ma‘lûmü’l-hudûd mutasarrıf olduğu bostanını âhara bey‘ murâd ettikde mezbûr Mehmed Ağa’nın yeğeni ve vekîli Ali Bey nâm kimesne bostan-ı mezkûra müşteri bulun bey‘ olundukda ben de ücret-i dellâle veririm deyü benimle mezbûr Kostantin’e emr ve sipâriş ettikden sonra bostan-ı mezbûr bey‘ olundukda mezbûr Ali Bey ücret-i dellâle olmak üzere merkūm Kostantin’e yüz altı guruş verip ol dahi ahz u kabz etmekle meblağ-ı mezbûrdan hisseme isâbet eden elli üç guruşu taleb ederim deyü da‘vâ ol dahi bostan-ı mezkûrun bey‘ini ve ücret-i dellâle olmak üzere bir mikdâr akçe ahzını ikrâr lâkin mezbûr Ali Bey bostan-ı mezkûrun bey‘ini ancak bana sipâriş ve emretmişdir deyü müdde‘î-i mezbûrun ber-vech-i muharrer ziyâde müdde‘âsını ba‘de’l-inkâr müdde‘î-i mezbûr müdde‘âsını beyândan ızhâr-ı acz birle bi’t-taleb merkūm Kostantin ba‘de’t-tahlîfi’ş-şer‘î müdde‘î-i mezbûr Ağya zimmî bilâ-beyyine bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 6 Şevval sene 1162