Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 327 Hüküm no: 388 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. İbşir Kaptan’ın kaybettiği atın Hasan b. Mustafa’nın yanında olduğu tespit edildiğinden atın Ali Bey’e iadesine karar verildiği Ma‘rûz Mumcu Mehmed Beşe mübâşeretiyle Bâb Mahkemesi’ne ihzâr olunan Hasan b. Mustafa’nın hasmı Ali Bey b. İbşir Kapudan meclis-i şer‘-i hatîrde mezbûr Hasan muvâcehesinde işbu mu‘âyene olunan bir re’s kır at yedimde mülk ve hakkım iken târih-i i‘lâmdan altı gün mukaddem Sultan Bâyezid-i Velî Han Câmi‘-i şerîfi kurbünde müsâfiren sâkin olduğum İsmail Çavuş’un menzilinden zâyi‘ etmişidim hâlâ zikrolunan atı mezbûr Hasan yedinde buldum bi’l-istihkāk taleb ederim deyü ba‘de’d-da‘vâ ve’s-suâl mezbûr Hasan cevâbında at-ı mezkûru gāib ani’l-meclis ismi ma‘lûmum olmayan bir kimesneden dört gün mukaddem yirmi altı guruş semen-i medfû‘ ve makbûza iştirâ edip mülk-i müşterâm olmak üzere vaz‘-ı yedini ikrâr mâ‘adâyı inkâr edicek müdde‘î-i mezbûr ber-vech-i muharrer müdde‘âsını lede’t-tezkiye adâletleri zâhir olan Müezzin Murad b. Şa‘bân ve Mustafa Beşe b. Durak nâm kimesneler şehâdetleriyle mezbûr Hasan muvâcehesinde vech-i şer‘î üzere ba‘de’l-isbât ve’t-tahlîf mûcebince zikrolunan atı müdde‘î-i mezbûr Ali Bey’e teslîme mezbûr Hasan’a tenbîh olunduğu huzûr-ı âlîlerine i‘lâm olundu. Fî 9 Şevval sene 1162