Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 330 Hüküm no: 396 Orijinal metin no: [51b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kendilerine tahsis edilen miktardan fazla olarak Yahudi sığır kasaplarının cezalandırılacakları Bâ-mühr-i hazret-i efendi sığır kasabları Ma‘rûz Yahûd tâifesine mahsûs dört nefer Yahûdî kasablarından Avram v. David ve Kemâl v. Harun meclis-i şer‘de sa‘âdetlü yeniçeri ağası kulları ma‘rifetiyle ashâb-ı arzuhâlde sığır kasabları kethudâsı Mustafa Çelebi ve yiğitbaşıları diğer Mustafa ve ustalarından el-Hâc Abdullah ve el-Hâc Mehmed ve es-Seyyid İbrahim Çelebi ve diğer el-Hâc Mehmed ve gayri el-Hâc Mehmed ve Ahmed Çelebi ve İbrahim Çelebi ve Salih Çelebi ve sâirleri muvâcehelerinde eğerçi bâ-fermân-ı âlî nizâm-ı kadîmimiz Âsitâne-i sa‘âdet’e gelen sığır ve inek ve manda süreklerinden Yedikule hâricinde Tokat nâm mahalle geldikde cümle ma‘rifetiyle yüz sığırda on beş sığır Yahûdî tâifesine ifrâz ve mâ‘adâsı sığır kasabları beynlerinde tevzî‘ oluna gelip lâkin tâife-i Yahûdun ekser yapdıkları sığır eti olduğundan hisse-i mezkûrenin adem-i kifâyetine binâen biraz müddetden beri işbu sığır kasabları kethudâsı ve ustaları rızâlarıyla ve ittifâklarıyla Yahûd hisselerine yüz sığırda yirmi beş sığır ifrâz ve bazı eyyâmımız için dahi senede iki yüz elli mikdârı sığır hissemizden ziyâde verirler idi işbu sene-i mübâkerede yüzde on beşden ziyâde vermeyip tâife-i Yahûdun lahm husûsunda müzâyakalarına dâdî [bâdî] olurlar deyü teşekkî kethudâ-yı merkūm ve ustalar istintâk olundukda herbiri hâmiş-i arzuhâlde derkenâr olunan emr-i âliye mûceblerince Yahûdî tâifesinin hisseleri ez-kadîm yüz sığırda on beş sığır ifrâz olunur ve bazı vakitde istirhâmlarına binâen rızâmız ile bir mikdâr ziyâdece ifrâz ve eyyâm-ı mahsûsalari’çün dahi bir mikdâr sığır verdikleri var ancak işbu mesfûrân ve gāibân ani’l-meclis Matram oğlu Mosi ve Köse Yazıcı nâm dört nefer Yahûdî kasabı ve sâirleri sürekleri tokata gelmezden mukaddem Çorlu ve Bogos [Bergos] kazâlarında karşılayıp ziyâde bahâ ile alalarını <> intihâb ve ekserini iştirâ etmek müte‘addid ve emr-i âliye ile memnû‘ ve bu makūle karşılayıp hufyeten iştirâ eyledikleri sığırlar tokada [52a] sevk ve tesyîr ve nizâmımız üzere tevzî‘ ve kendilere tedîb olunmak emr-i âlîşândan musarrah iken mesfûrlar hilâf-ı emr-i âlî bu sene-i mübârekede sürekleri karşılayıp bin re’sden mütecâviz sığır intihâb ve hufyeten iştirâ eylediler mesfûrların bu makūle hareketleri’çün fîmâ-ba‘d nizâm-ı kadîmimiz üzere hisseleri ifrâz olunup kat‘a hilâf-ı emr-i âlîşân hareket olunmayıp hilâfıyla hareket edenlerin tedîbi tenbîh-i ekîd olunması matlûbumuzdur deyü min-külli’l-vücûh takrîrlerine mutâbık emr-i âliye ibrâz ve merkūmân Yahûdiler bazı eyyâm-ı mahsûsumuz için üç yüz mikdârı sığır iştirâ etmişidik deyü ikrâr dahi etmeleriyle fîmâ-ba‘d ber-mûceb-i nizâm-ı kadîm Yahûdî tâifesi hisselerine ancak yüz sığırda on beş sığır ifrâz olunup ve hilâf-ı fermân-ı âlî sürekleri karşılayıp hufyeten sığır iştirâ eyledikleri tedîb [istimâ‘] olunur ise ol makūle sığırlar yeniçeri ağası kulları ma‘rifetiyle Tokad’a sevk ve tesyîr ve nizâm-ı kadîmleri üzere tevzî‘ ve sahibleri tedîb olunup nizâm-ı kadîm-i mezkûr ale’d-devam düstûrü’l-amel olmak üzere mezbûrûnun emr-i âlîşân sudûrunu istid‘â ve istirhâm eyledikleri ma‘lûm-ı devletleri buyurulmak emr [ü] fermân hazret-i men-lehu’l-emrindir. Fî 14 Şevval sene 1162