Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 63 Hüküm no: 27 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devrekânî kazasının İnceğiz köyündeki Halil Bey Camii’nin imamet ve hitabet cihetlerinin Seyyid Mehmed’e tevcihi Ma‘rûz, Devrekâni kazâsına tâbi‘ İnceğiz nâm karyede vâki‘ Halil Bey Câmi‘-i şerîfinin vazîfe-i mu‘ayyene ile imâmet ve hitâbet cihetleri es-Seyyid Hâfız Mehmed Emin es-Seyyid Mehmed’in üzerinde olduğu askerî rûznâmçesinden derkenâr olunmağla istid‘â ve derkenâra nazar ve lede’t-terâfu‘ iktizâsı i‘lâm olunmak bâbında sâdır olan fermân-ı âlîlerine imtisâlen mezbûr es-Seyyid Hâfız Mehmed meclis-i şer‘-i münîrde büyükbabası es-Seyyid Mehmed b. Hüseyin nâm kimesne muvâcehesinde takrîr-i kelâm edip ciheteyn-i mezkûreteyn fi’l-asl büyük pederim merkūm es-Seyyid Mehmed’in üzerinde iken kasr-ı yedinden sulbî oğlu babam diğer es-Seyyid Mehmed’e tevcîh olunmuş ve ba‘dehû onun dahi mahlûlünden bana tevcîh buyurulmuş ise de büyük pederim merkūm ciheteyn-i mezkûreteyni ben rızâmla kasr-ı yed etmeyip fakat yedimde olan beratımı oğlum müteveffâ-yı mezbûra li-ecli’l-hıfz emâneten bırakmış idim deyü da‘vâya tesâddîettikde merkūm es-Seyyid Mehmed ceddim olup tatyîb-i hâtırı mültezimim olduğundan ciheteyn-i mezkûreteyni hüsn-i rızâ ve tayyib-i hâtırım ile mezbûr es-Seyyid Mehmed’e kasr-ı yed ve beratımı dahi huzûr-ı şer‘de teslîm etmemle ciheteyn-i mezkûreteyn kasr-ı yedimden ceddim mezbûra tevcîh buyurulmak niyâzımdır deyüp bu vechile bi’t-terâzî kat‘-ı nizâ‘ etmeleriyle bu sûretde ciheteyn-i mezbûreteyn kasr-ı yedden ceddi merkūma tevcîh olunmak bâbında emr [ü] fermân hazret-i veliyyü’l-emrindir. Fî 9 S sene [12]48