Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 64 Hüküm no: 28 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ürgüb kazasının Avanos köyündeki Solak Ahmed Muallimhanesi sıbyanlık muallimliği, Bayır mahallesindeki Dolamaoğlu Camii imam-ı sânîlik ve hitabet cihetlerinin Seyyid Abdülhamid Halîfe’ye tevcihi Ma‘rûz, Nevşehir ma‘a-Ürgüb kazâsına tâbi‘ Avanos karyesinde Hasan Beşe Câmi‘-i şerîfi ittisâlinde vâki‘ Solak Ahmed Mu‘allimhânesi’nin ber-vech-i hasbî mu‘allim-i sıbyânlık ve yine karye-i mezbûrede Bayır mahallesinde vâki‘ mezbûr Hasan Beşe’nin binâ ve Dolamaoğlu’nun tevsî‘ eylediği câmi‘-i şerîfde ber-vech-i hasbî imâm-ı sânîlik ve yine karye-i mezbûrede vâki‘ Dolamaoğlu nâm sahibü’l-hayrın binâ ve es-Seyyid Ali nâm sahibü’l-hayrın minber vaz‘ eylediği câmi‘-i şerîfde ber-vech-i hasbî hitâbet cihetleri el-Hâc Abbas Halîfe b. Ömer’in üzerinde olduğu askerî rûznâmçesinden derkenâr olmağla iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden Der-aliyye’de bulunan bî-garaz erbâb-ı vukūfdan Hâfız Ahmed b. Abdullah ve es-Seyyid Hasan b. Osman ve Ali b. Ali nâm kimesneler huzûr-ı şer‘a celb ile keyfiyeti gereği gibi etrâfıyla suâl olunarak derûn-ı arzuhâlde tahrîr ve inhâ kılındığı üzere cihât-ı mezkûreyi mezbûr el-Hâc Abbas Halîfe’nin sahib-i arzuhâl merkūm es-Seyyid Abdülhamid’e kasr-ı yedi rızâsıyla idiği vâki‘ ve mezbûr es-Seyyid Abdülhamid dahi her vechile ehil ve elyak ve muhtâr-ı cemâ‘at olduğunu herbiri alâ-tarîkı’ş-şehâde ihbâr etmeleriyle bu sûretde şurûtu mûcebince atîk beratları kaleminde battala hıfz olmağla ve bi’n-nefs edâ-yı hizmet etmek şartıyla cihât-ı mezkûre merkūm el-Hâc Abbas Halîfe’nin kasr-ı yedinden mezbûr es-Seyyid Abdülhamid Halîfe’ye tevcîh olunmak iktizâ eylediği huzûr-ı âlîlerine i‘lâm olundu. Fî 9 S sene [12]48