Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 333 Hüküm no: 400 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazzaz Avanis v. Haron’un, ortaklıktan dolayı alacağı olduğu iddiasıyla Kazzaz Avadik v. Artin’e açtığı davada haksız bulunarak davanın reddedildiği Ma‘rûz Kazzâz tâifesinden arzuhâl sahibi Avanis zimmî v. Haron meclis-i şer‘de tâife-i mezkûreden derûn-ı arzuhâlde mezkûrü’l-ism Avadik v. Artin zimmî muvâcehesinde mukaddemâ mezbûr Avadik ile kazzâzlık ticâretinde ba‘de akdi’ş-şirketi bin yüz elli beş târihine gelince eylediğimiz ticâretimizin ahz u i‘tâ ve asl-ı mâl ve ribhinin hesâbını târih-i mezkûrda görüp herbirimiz âharın zimmetini ibrâ ile fesh-i akd-i şirket eylediğimizden sonra yine mal-ı merkūm Avadik zimmînin ve amel ikimizin ve nemâ beynimizde müsâvî olmak üzere tecdîd-i akd-i şirket-i inân edip târih-i mezbûrdan târih-i i‘lâma gelince yedi senede olan i‘mâl ve hâsıl olan nemâmızın dahi hâlâ hesâbı görülüp merkūm Avadik zimmetinde ve yedinde nemâdan zuhûr eden nısf hissemi bana edâsına tenbîh taleb ederim deyü olan da‘vâsında müdde‘î-i mezbûrun takrîr-i meşrûhu üzere şirketleri fâside olup şer‘an kendiye amelinin ecr-i misli iktizâ edip ve hasmı merkūmun dahi cevâbında müdde‘î-i mezbûru yanımda ecr-i misli olan haftada birer buçuk guruş ücretle kalfa ve işçi istîcâr edip müddet-i mezkûrede dahi beher ay altışar guruş ücretini tamamen kendiye edâ [52b] etmişidim deyü olan def‘ini dahi ikrâr ve i‘tirâf etmeğin alâ-mûceb-i i‘tirâfihî müdde‘î-i mezbûr da‘vâ-yı mezkûresiyle merkūm Avadik’e bî-vech mu‘ârazadan men‘ olunduğu Mahkeme-i Bâb’dan tescîl ve huzûr-ı âlîlerine i‘lâm olundu el-emrü li-men-lehu’l-emrindir. Fî 14 Şevvali’l-mükerrem sene 1162