Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 334 Hüküm no: 401 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakkaş esnafının, nizama aykırı davranışları olan İbrahim b. Mustafa’nın nakkaşlık esnaflığından ihraç edilmesi talepleri Ma‘rûz Nakkāş tâifesinin du‘âcıları ve bi’l-fi‘il Nakkāşbaşı Mehmed Ağa’nın vekîl-i sâbitü’l-vekâlesi olan el-Hâc Ali b. Abdülmennan ve ustalardan Osman Beşe b. Hüseyin ve İbrahim Odabaşı b. Ahmed ve Süleyman Odabaşı b. Abdülfettah ve Bayrakdâr Mehmed Beşe b. Osman ve es-Seyyid İbrahim b. İsmail ve Molla Hüseyin b. Muslu meclis-i şer‘-i enverde diğer es-Seyyid İbrahim b. Mustafa muvâcehesinde mezbûr diğer es-Seyyid İbrahim san‘at-ı mezkûremiz ustalarından olup ancak mezbûr diğer es-Seyyid İbrahim öteden beri kendi hâlinde olmayıp san‘at-ı mezkûre nizâmında ihtiyâr ustalarımıza dâimâ muhâlefet üzere olmağla san‘at-ı mezkûre ricâli beynine tefrika ve kadîmî nizâmlarımıza ihtilâl verir deyü da‘vâ ve mezbûr diğer es-Seyyid İbrahim’in salâhı zâhir olunca san‘at-ı mezkûreyi işlemekden men‘le ta‘zîr olunması ricâsında oldukları Mahkeme-i Bâb’da tescîl ve huzûr-ı âlîlerine i‘lâm olundu fermân men-lehu’l-emrindir. Fî 18 min-Şevvali’l-mükerrem sene 1162