Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 337 Hüküm no: 407 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mehmed’in ortak olarak kasaplık yaptıkları Tiryaki Mehmed b. Süleyman’a olan borcunu ödemesi Ma‘rûz Ağnâm kasabı tâifesinden Sultan Bâyezid Han Câmi‘-i şerîfi havlusu çâryekçilerinden derûn-ı arzuhâlde mezkûr Tiryâki Mehmed b. Süleyman meclis-i şer‘-i enverde sahib-i arzuhâl diğer Mehmed b. Mehmed muvâcehesinde mukaddemâ mezbûr diğer Mehmed ile üç ay kasablıkda şerîk olup müddet-i mezkûrede olan ticâretimizin ve beynimizde cârî olan ahz u i‘tâmızın huzûr-ı Müslimînde kirâren ve mirâren hesâb-ı sahîh ile hesâbını gördüğümüzde benim mezbûr diğer Mehmed zimmetinde yüz elli guruş hakkım zuhûr edip ve hesâb-ı mezkûrumuz kirâren ve mirâren rü’yet olunup kat‘a sehv ve galat olmamağla mezbûr diğer Mehmed dahi meblağ-ı mezkûr yüz elli sekiz guruş zimmetinde bana deyni olduğunu kat‘iyen ikrâr edip herbirimiz meblağ-ı mezbûrdan mâ‘adâ şirket-i mezkûreye müte‘allika âmme-i da‘vâdan âharı ibrâ eyledikden sonra mezbûr diğer Mehmed ber-vech-i muharrer yedime işbu deyn temessüğünü dahi vermişiken hâlâ meblağ-ı mezbûr yüz elli sekiz guruşu vermekden imtinâ‘ eder edâsına tenbîh taleb ederim deyü ba‘de’d-da‘vâ mezbûr diğer Mehmed cevâbında şirket-i mezkûreyi ikrâr mâ‘adâyı inkâr etmeğin müdde‘î-i mezbûr Tiryâki Mehmed müdde‘âsını ahrâr-ı ricâl-i Müslimînden ve tâife-i mezkûre ustalarından lede’t-tezkiye şehâdetleri makbûle olan es-Seyyid Ali Çelebi b. Mehmed ve Turşucuoğlu Mustafa Beşe b. Ahmed ve es-Seyyid Yusuf Çelebi b. Şa‘bân ve Hasan Beşe b. Mustafa nâm kimesneler şehâdetleriyle mezbûr diğer Mehmed muvâcehesinde vech-i şer‘î üzere ba‘de’l-isbât ve’l-kabûl mûcebiyle meblağ-ı mezbûr yüz elli sekiz guruşu müdde‘î-i mezbûr Tiryâki Mehmed’e edâ ve teslîm ile mezbûr diğer Mehmed’e tenbîh olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 22 min-Şevval sene 1162