Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 336 Hüküm no: 406 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divan-ı hümayun kâtiplerinden Ali Reyî Efendi b. Mustafa’nın tasarrufundaki Aksaray sancağında muhacirin-i Acem Türkmeni zeameti iltizamından Hüseyin b. Mustafa’da olan alacak davası Ma‘rûz Dîvân-ı hümâyûn kâtiblerinden olup Aksaray sancağında vâki‘ cemâ‘at-i muhâcirîn-i Acem Türkmeni ze‘âmetine mutasarrıf olan sahib-i arzuhâl Ali-i Reyî Efendi b. Mustafa nâm kimesne meclis-i şer‘-i enverde ze‘âmet-i mezkûre ahâlîsinden derûn-ı arzuhâlde mezkûr Hüseyin b. Mustafa nâm kimesne muvâcehesinde mukaddemâ ze‘âmet-i mezkûremin bir senelik mahsûlünü mezkûr Hüseyin’e beş yüz guruşa der-uhde ve iltizâm ol dahi ba‘de’l-kabûl tamamen zabt dahi eyledikden sonra bedel-i meblağ-ı mezbûrun dört yüz guruşunu edâ ve bâkī yüz guruşunu vermeyip zimmetinde kaldığından mâ‘adâ ze‘âmet-i mezkûrem re‘âyâsını tahrîk ve beynlerinde îkāz-ı fitne ve umûr-ı ze‘âmete ihtilâl verip ve tarafımdan olan subaşılarıma zabtettirmeyüp ve ber-mûceb-i sûret-i defter-i hâkānî olan mahsûlât ve rüsûmâtımı vermeyip ve akrabâ ve ta‘allukātı olan kimesnelere dahi verdirmeyip ze‘âmetim mahsûlüne kesr ve noksan vermekle hâlâ mezkûrdan suâl olunup ze‘âmet-i mezkûrem mahsûlünden zimmetinde bâkī kalan meblağ-ı mezkûr yüz guruşu bana edâ ve zimmetinde müctemi‘a olan rüsûmu dahi mahâllinde subaşılarıma verip ve fîmâ-ba‘d ze‘âmetim umûruna karışmamak üzere mezkûra tenbîh olunmasını taleb ederim deyü olan da‘vâsında mezkûr Hüseyin bedel-i iltizâm olan meblağ-ı mezkûr beş yüz guruşu müdde‘î-i mezbûra tamamen edâsını ba‘de’d-da‘vâ ve’l-inkâr beyâni’çün istimhâl edip ve bâlâda mezkûr olduğu üzere umûr-ı ze‘âmete ve re‘âyâsına müdâhalesini külliyyen inkârından mâ‘adâ fîmâ-ba‘d dahi karışmamak ve hasbe’ş-şer‘i’l-enver ve’l-kānûni’l-münîf zimmetine iktizâ eden rüsûmu dahi subaşılarına edâya ta‘ahhüd edip ol vechile kat‘-ı nizâ‘ eyledikleri Bâb’dan huzûr-ı âlîlerine i‘lâm olundu. Fî 22 Şevval sene 1162